Ажно чатыры дні з 7 па 10 лістапада гродзенцы будуць адпачываць ад працы. Hrodna.life склаў спіс мерапрыемстваў, якія дакладна не дадуць засумаваць. У нашай падборцы — канцэрты, майстар-класы і экскурсіі для доўгіх выхадных.
7 лістапада — катаемся па горадзе
Усе выхадныя, з 7 па 10 лістапада, можна будзе трапіць на Гродзенскі аўтаквэст. Падчас гульні ўдзельнікам трэба будзе выканаць 10 заданняў і адшукаць столькі ж лакацый. Арганізатары абяцаюць бясконцую колькасць эмоцый і азарту. Для рэгістрацыі на квэст дастаткова звязацца з арганізатарамі ў Instagram.
8 лістапада — ідзём на кацнэрты
Першапачаткова паведамлялася, што зорка беларускага TikTok Ілля Шынкарэнка выступіць з канцэртам 8 лістапада. Аднак за два дні да мерапрыемства ў Instagram музыкі з’явілася аб’ява, што ў Гродна ён прыедзе 15 лістапада.
Канцэрт адбудзецца ў бары Five-No на Вялікай Траецкай, 46. Пачатак, а 20:00, кошт квіткоў — 10 руб.
У бары «Урбаніст» на Маставой, 31 зробяць вечарынку, на якой выступіць гомельскі дыджэй і калекцыянер рэдкіх танцавальных кружэлак Улад Kozyrev. Будуць гучаць бугі, хаўс, фанк і дыска.
Пачатак імпрэзы, а 20:00, кошт квіткоў — 10 руб.
9 лістапада — вучымся ляпіць з гліны і даведаемся таямніцы Гродна
У студыі «Аранжарэя» стартуе майстар-клас па лепцы з нуля. Удзельнікі будуць ствараць вырабы з гліны пад кіраўніцтвам майстра. Арганізатары адзначаюць, што майстар-клас падыдзе дзеткам з асаблівымі патрэбамі.
Пачатак мерапрыемства, а 14:30.
Яшчэ адзін майстар-клас, але ўжо тэматычны, правядуць у студыі «Час мастацтва». Абяцаюць вампірскую тэматыку ў атмасферы стужкі «Прыцемкі», а перад пачаткам майстар-класа ўдзельнікі паглядзяць кароткаметражны фільм. А затым — маляванне «змрочнага лесу алеем».
Пачатак мерапрыемства, а 19:00.
Тэатралізаваную экскурсію па Гарадніцы правядуць арганізатары «Таямніцы Гродна». У праграме — арганны канцэрт у кірсе, прагулка па старажытных кутках горада, наведванне Пакроўскага сабора і «смачны» камплімент.
Кошт квіткоў — 45 руб.
10 лістапада — адпраўляемся ў парфумернае падарожжа
Гродзенцаў клічуць у «парфумернае падарожжа». У студыю фларыстыцы Frida (Будзёнага, 28) прыедзе парфумерны стыліст Анастасія з Мінску. Удзельнікаў чакае «лёгкі сняданак, нязмушаныя зносіны і кветкавыя пасланні».
Кошт удзелу ў майстар-класе — 120 руб., пачатак мерапрыемства ў 12:00 (10 лістапада).
Скончыць доўгія выходныя можна будзе гульнёй у мафію ў кавярні «Смак мастацтва» (Калючынская, 12). Колькасць месцаў абмежавана, але тым, хто паспее запісацца на гульню, абяцаюць піва, шампанскае, сокі і закускі.
У мафію пачнуць гуляць, а 18:00, для запісу на гульню трэба звязацца з арганізатарамі ў Instagram.
