У Беларусі прадаюць сетку кафэ-кандытарскіх — адна з самых вялікіх устаноў працуе ў Гродне

На продаж выставілі сетку кафэ MyLoverBerry. Адна з трох устаноў знаходзіцца ў Гродне — менавіта там увялі падвойныя кубкі для бабл-ці і падавалі дубайскі шакалад. Інфармацыя аб продажы бізнесу з’явілася на сайце biz4y.com.

Гатовы бізнес абыдзецца ў $ 400 тысяч

У аб’яве адзначаецца, што бізнес «прыбытковы і маштабаваны», з выбудаванымі працэсамі для «ўстойлівага функцыянавання».

Сетка ўключае ў сябе кандытарскую вытворчасць і некалькі ўстаноў. Дзве з іх плошчай 140 і 70 м.кв. знаходзяцца ў Мінску, а трэцяя, плошчай 120 м.кв. — у Гродне.

Уладальнікі дадаюць, што ёсць наладжаны анлайн-гандаль з дастаўкай, а таксама ўкамплектаваны штат з больш чым 40 супрацоўнікаў.

Першапачаткова кафэ MyLoverBerry пазіцыянавалася як установа, якая спецыялізуецца на трускалцы ў шакаладзе. Пазней пазіцыі ў меню пачалі пашыраць, дадаліся папулярныя дэсерты. Напрыклад, дубайскі шакалад, бабл-ці і плоскія круасаны.

Таксама кафэ выдзяляецца і дзякуючы яркаму інтэр'еру, выкананаму ў ружовых адценнях.

Чаму кафэ стала такім папулярным у Гродне

Бізнес запусціла сямейная пара Арцёма і Ксеніі Быкоўскіх. Першая ўстанова адкрылася ў 2022 годзе, калі маладым людзям было па 19 гадоў. Па меры развіцця кандытарскай сеткі ў беларусаў атрымалася дасягнуць абароту ў 2,5 млн рублёў у год.

Як прызнаваліся Быкоўскія, яны спрабавалі запусціць сетку і ў іншых гарадах акрамя Мінску. Але прыжылося кафэ толькі ў Гродне. «Для сябе мы тлумачым гэта тым, што ў Гродне вышэйшыя даходы насельніцтва і некалькі іншая мэтавая аўдыторыя, больш еўрапеізаваная», — адзначалі прадпрымальнікі.