Паветра ў Гродне ў 2023 годзе было чысцей, чым у іншых абласных цэнтрах Беларусі. Пра якасць паветра ў гарадах расказаў Белстат. На апублікаваныя дадзеныя звярнуў увагу канала Urban Hrodna.
Сярэднегадавы ўзровень утрымання цвёрдых часціц класу PM10 у 2023 годзе склаў у Гродне 7 мікраграмаў на кубічны метр паветра. Гэта ў разы менш за паказчыкі ў любым іншым абласным цэнтры Беларусі. Асабліва кепска выглядае на фоне Гродна Гомель — 44 мікраграмы на кубічны метр паветра. Гэта пры тым, што гранічна дапушчальная канцэнтрацыя такога пылу — 40 мікраграм на кубічны метр.
Што за PM?
— Часціцы класу РМ 2,5 — гэта тонкадысперсныя часціцы і пыл ад 2,5 мікрон і менш.
PM 2,5 — гэта больш дробны пыл, які для здароўя больш шкодны, бо можа трапляць глыбока ў лёгкія.
Чаго не расказаў Белстат і дзе знайсці дадзеныя
Афіцыйна ў межах Нацыянальнай сістэмы маніторынгу навакольнага асяроддзя ў Беларусі часціцы PM2,5 манітораць толькі ў Мінску і Жлобіне. Таму пра ўтрыманне ў гродзенскім паветры цвёрдых часцін класу РМ 2,5 Белстат нічога не расказаў.
Вартыя даверу дадзеныя па дробных часціцах у гродзенскіх паветры знайсці няпроста. У межах праекту грамадскага маніторынгу якасці паветра працуе адна кропка на Дзевятоўцы — паводле яе дадзеных канцэнтрацыя дробных часціц большую частку дня складае каля 7 мікраграмаў - гэта ў два разы менш за дапушчальны паказчык. Праўда, цягам дня паказчык можа істотна скакаць уверх і ўніз.
Падобныя лічбы атрымліваюцца ў выніку мадэлявання з дапамогай спутнікавых дадзеных. А вось мадэльныя прагнозы «Яндэкс Карт» паказваюць большае забруджанне — але ўсё яшчэ ў межах дапушчальнай якасці паветра.
У 2021 годзе ўтрыманне ў паветры часціц, у тым ліку класу PM 2,5, у цэнтры Гродна замярала рэдакцыя Hrodna.life. Мы назіралі за паказчыкамі 28 дзён — і палову гэтага часу на вуліцы Кірава забруджанне паветра было большым за дапушчальныя стандарты Сусветнай арганізацыі аховы здароўя.
Чытай наш лонгрыд: Што з паветрам у Гродне — самым аўтамабілізаваным горадзе Беларусі
