У Гродне на вуліцы Леніна, 23 прадаюць былы інтэрнат. Трохпавярховы будынак (два паверхі і мансарда) з цэглы выставілі на аўкцыён, паведаміў Дзяржаўны камітэт па маёмасці.
![У цэнтры Гродна прадаюць будынак пачатку ХХ ст. Калісьці там было ўпраўленне Міністэрства сувязі](https://hrodna.life/wp-content/uploads/2024/07/Lenina-23-800x600.webp)
Будынак плошчай амаль 329 кв.м належыць дзяржаве і зараз не выкарыстоўваецца. Там адключаны ацяпленне, каналізацыя і водазабеспячэнне. Побач з будынкам ёсць праезд і пляцоўка.
Зараз былы інтэрнат знаходзіцца на балансе Гродзенскага цэнтра нерухомасці.
Што гэта за будынак?
Будынак па вуліцы Леніна, 23 — дом Аляксандра Мазалеўскага, які пабудавалі з жоўтай цэглы ў 1910 — 1912 гадах. Першапачаткова ён не быў пафарбаваны. Дэкаратыўная аздоба сканцэнтравана на парадным фасадзе. Пабудову лічаць яркім прыкладам «цаглянага» стылю.
У савецкія часы ў ім па чарзе размяшчаліся розныя дзяржаўныя ўстановы: абласное ўпраўленне Міністэрства сувязі БССР, абласны аддзел «Саюздрук», транспартная кантора Міністэрства сувязі, абласны склад Міністэрства сувязі. У 1959 годзе там адкрылі сельскагаспадарчую школу, а ў 1982 годзе — інтэрнат прафесійна-тэхнічнай вучэльні № 41.
Чытайце таксама: У цэнтры Гродна можна купіць будынак 1912 года. Колькі ён каштуе і што можна з ім рабіць?