Чыноўнікі прыслухаліся да грамадзян. На Магістральнай вырашылі не будаваць шматпавярховік

На вуліцы Магістральнай замест малапавярховай забудовы і дзіцячага садка хацелі будаваць дом на 10 паверхаў. Але гродзенцы выказаліся супраць і праект не прайшоў грамадскія абмеркаванні. Адпаведную інфармацыю апублікавалі на сайце Гродзенскага гарвыканкама.

Што прапаноўвалі грамадзяне?

На грамадскія абмеркаванні вынеслі праект шматкватэрнага дома на 6−10 паверхаў. Падчас грамадскіх абмеркаванняў, якія адбыліся з 5 па 19 чэрвеня, грамадзяне выслалі шэсць зваротаў.

Іх пытанні тычыліся:

• колькасці парковачных месцаў;
• сучасных дзіцячых і спартовых пляцовак;
• адсутнасці пляцоўкі для выгулу сабак;
• будаўніцтва дзіцячага садка;
• магчымасці панізіць планаваны дом да 5−6 паверхаў;
• колеравага рашэння жылога дома;
• стварэння добраўпарадкаванага сквера (парка).
  

Пасля грамадскіх абмеркаванняў архітэктурна-горадабудаўнічы савет вырашыў адмяніць існуючую архітэктурна-планіровачную канцэпцыю. Распрацоўшчыку праекта — «Гроднажылбуд» — трэба прапрацаваць варыянты развіцця квартала з улікам меркавання грамадзян.

Чытайце таксама: Пяць слоў, якія вырашылі лёс, або чаму неабходна хадзіць на грамадскія абмеркаванні, каб захаваць Гродна