Пракат шэзлонгаў і парасонаў хочуць пашырыць на ўсе пляжы Гродна

Гродзенскія ўлады плануюць добраўпарадкоўваць гарадскія пляжы ў Гродне і пляж на Юбілейным возеры. Змяніцца выгляд і летніх душаў, і фантанчыкаў. Таксама туды паспрабуюць прыцягнуць гандаль і распаўсюдзіць пракат шэзлонгаў і парасонаў на ўсе пляжы Гродна.

Будуць разбірацца і са спартыўнымі пляцоўкамі. «Каб, сапраўды, пляжны адпачынак быў падобны да пляжнага», — пракаментаваў планы кіраўнік гарвыканкама Андрэй Хмель у жывым эфіры на «Гродна Плюс».

Гэтым летам на возеры Юбілейным з’явіўся пракат парасонаў, шэзлонгаў, столікаў. «Гэта проба пяра для таго, каб проста паглядзець, ці ацэняць гэта грамадзяне», — сказаў Андрэй Хмель.

«Калі мы будзем бачыць, што гэта ўспрымаецца грамадзянамі станоўча, значыць, будзем развіваць яе паўсюдна», — сказаў Хмель. Як хутка гэта адбудзецца, ён не ўдакладніў, але сказаў, што пакуль паслуга карыстаецца поспехам.

Зараз пракат працуе з пятніцы па нядзелю з 10:00 да 22:00. Шэзлонг каштуе 1,80 руб. за першыя 2 гадзіны, далей — 0,90 руб. за кожную дадатковую гадзіну. Парасон — 1,50 руб. і 0,70 руб., стол — 0,90 і 0,40 адпаведна. Шэзлонгі і парасон можна арандаваць і камплектам, у такім выпадку столік дадуць бясплатна.

Чытайце таксама: Пакупацца і не атрымаць штраф: карта дазволеных пляжаў у Гродне і Гродзенскай вобласці 2024