Георгій Рой у Гродне. Фота з архіву Hrodna.life
Гродзенскі святар Георгій Рой, які летась з’ехаў з Беларусі, патрапіў у расійскую базу крымінальнага вышуку. Раней на яго завялі крымінальную справу ў Беларусі, паведаміў святар Hrodna.life.
Пра тое, што Георгій Рой знаходзіцца ў вышуку ў Расіі, святар даведаўся з Telegram-канала «Хрысціяне супраць вайны».
«Я ведаў, што на мяне заведзена крымінальная справа ў Беларусі і, адпаведна, пра тое, што я ў вышуку. Тут проста наступны крок — беларускія сілавікі перадалі мае дадзеныя ў Расію, — сказаў Рой. — Усё гэта было цалкам прадказальна, таму нейкіх асаблівых эмоцый не маю. Цікава і крыху нават смешна, што ў аб’яве пра росшук адносна асаблівай прыкметы напісалі „святар“. Вось такі „прыкметны святар“ атрымаўся».
У базе вышуку святар пазначаны як Рой Юрый Вячаслававіч, бо паводле пашпарта ў яго менавіта такое імя.
«Паводле пашпарта і ў сям'і мяне завуць Юрый. Але гэта славянскае імя адпавядае грэчаскаму і царкоўнаму Георгій. Мяне хрысцілі ў гонар Юрыя/Георгія Пераможца. Таму ў царкве маё імя Георгій».
Вясной 2023 года гродзенскі святар Георгій Рой з’ехаў з Беларусі. Яго разам з мінскім іерэем Аляксандрам Кухтам прынялі ва Усяленскі патрыярхат праваслаўнай царквы, які размяшчаецца ў Стамбуле. Ім кіруе Патрыярх Канстанцінопальскі Варфаламей.
Георгій Рой быў раней настаяцелем Пакроўскага сабора ў Гродне. Яго ў ліпені 2021 года знялі з гэтай пасады і накіравалі служыць у храм у вёсцы Квасоўка побач з Гроднам. Рой быў адным з некалькіх праваслаўных святароў, якіх знялі з пасадаў пасля прымусовай адпраўкі на пенсію архіепіскапа Арцемія, які меў імідж прадэмакратычнага іерарха. У красавіку 2022 года Георгій Рой падпісаў зварот святароў РПЦ з заклікам да прымірэння і сканчэння вайны ва Украіне.
Святар пасяліўся ў Вільні. Там разам з Аляксандрам Кухтам яны арганізавалі Беларускі праваслаўны прыход. У кастрычніку 2023 года Telegram-канал «Беларускі праваслаўны прыход у Вільні» унеслі ў спіс экстрэмісцкіх матэрыялаў.
Шматгадзінныя чэргі, перфаратар і два акенца на рэгістрацыю. Дзяўчына схадзіла ў Гродзенскае агенцтва па дзяржаўнай…
Прадпрыемства "Гродна Азот" 12 лютага ў Telegram-канале анансавала конкурс да Дня роднай мовы. Да самога…
Палітзняволены з Гродна Кірыл Кетурка скончыў жыццё самагубствам у Цэнтры ўтрымання пад вартай у Варшаве-Служэўцы…
Былому сенатару і дырэктару «Краснасельскбудматэрыялы» Уладзіміру Кісялёву пагражае да трох гадоў калоніі за разгалашэнне службовай…
"Малочны Мір" абавязалі змяніць назву для серыі глазураваных сыркоў. Пасля чыёсьці скаргі ў Міністэрства антыманапольнага…
На Гагарына, 25 у Гродне прадаецца двухпакаёвая кватэра з выдатна захаваным постсавецкім інтэр'ерам. Дом, у…