Шукаць скарбы Храптовічаў, слухаць музыку і гуляць у квізы. Што на «Ноч музеяў» прапануюць у Гродне?

Выступ гурта «Вочы», феерверк і гульні прапануюць на «Ноч музеяў» у Гродне. Праграма «Чароўныя гісторыі. Ноч у музеі» адбудзецца 18 траўня 2024 года ў Новым замку. Прапанова цікава правесці вечар ёсць і ў Музея гісторыі рэлігіі.

Праграма «Чароўныя гісторыі. Ноч у музеі» ў Новым замку

18:30 — 19:00 — размеркаванне ўдзельнікаў па тэматычных групах для эксклюзіўнай праграмы;

19:00 — 20:30 — урачыстае адкрыццё; канцэртная праграма з удзелам народнага духавога аркестра і народнага камернага жаночага хору з Гродзенскага дзяржаўнага музычнага каледжа;

19:00 — 21:00 — аквагрым;

19:00 — 22:00 — «Хобі Гульні»;

19:00 — 22:00 — «Урок Прадказання».

20:00 — 22:00 — эксклюзіўная праграма:

• «Урок Гербалогіі»;
• «Урок Заклінанняў»;
• квэст «Сарваны ўрок»;
• «Гісторыя Магіі» (пешаходная экскурсія па вуліцы Замкавай);
• квіз-гульня «Турнір чатырох чараўнікоў».

20:30, 21:00 — прагляд тэматычных дыяфільмаў;

22:00 — 23:00 — кавер-версіі сусветных хітоў (жывы гук);

23:00 — святочны феерверк.

У Старым замку з 20:00 да 21:30 адбудзецца канцэрт гродзенскага гурта «Вочы». Экспазіцыі замкаў падчас мерапрыемстваў будуць працаваць з 19:00 да 22:30.

Колькі будуць каштаваць квіткі

Квіткі будуць прадаваць з 17 траўня ў касах Новага і Старога замкаў:

• эксклюзіўная праграма ў Новым замку — для дарослых, пенсіянераў і студэнтаў - 20 рублёў, а для школьнікаў - 10 рублёў.

• агульная праграма ў Новым замку — для дарослых, пенсіянераў і студэнтаў - 10 рублёў, а для школьнікаў - 6 рублёў.

• агульная праграма ў Старым замку — для дарослых, пенсіянераў і студэнтаў - 10 рублёў, а для школьнікаў - 6 рублёў.

Папярэдне запісацца на эксклюзіўную праграму можна па тэлефонах: 71−86−88 альбо +37 529 77−66−588.

Што будзе ў іншых музеях

У Гродзенскім дзяржаўным музеі гісторыі рэлігіі 18 траўня ў 19:00 таксама прапануюць культурніцкую праграму. На старонках музея абяцаюць, што падчас мерапрыемства госці змогуць «адшукаць у палацы згублены скарб рода Храптовічаў, вывучыць таямнічую мову японскага кімано», азнаёміцца з сімваламі Пасхі ў хрысціянстве і іўдаізме, а таксама прайсці квіз і даведацца, наколькі добра вы разбіраецеся ў мастацтве.

Таксама ёсць скарочаная праграма. Арганізатары прапануюць наведаць Лютэранскую кірху з пазнавальнай гульнёй «Уладар тысячы труб», а таксама паглядзець спектакль «Уединённый домик на Васильевском» у Тэатры лялек.

Цана:

Поўная праграма — 40 рублёў;

скарочаная праграма — 25 рублёў.

Запісацца можна ў каментарах пад пастом на старонцы музея ў Instagram.

Можна ўбачыць Гродна з вышыні

Музей гісторыі пажарнай службы Гродзеншчыны сёлета аб’яднаўся з галерэяй «Грышук Арсенал». Гасцям прапануюць наведаць адразу дзве экскурсіі - па Музеі пажарнай службы і па галерэі «Грышук Арсенал». Таксама ў наведвальнікаў будзе магчымасць падняцца на назіральную пляцоўку каланчы.

Экскурсіі будуць адбывацца штогадзіну з 16:00. Цана квітка для дарослых — 20 рублёў, для дзяцей — 15 рублёў. Папярэдне трэба запісацца па нумары тэлефона: +375 445 219 404

Чытайце таксама: Убачыць Гродна з каланчы. Фотарэпартаж Hrodna.life з Музея пажарнай службы