Да двух сутак. Як беларусы стаяць у чэргах на мяжы 9 траўня

На мяжы з Польшчай. Фота ілюстрацыйнае, крыніца: чат, прысвечаны перасячэнню мяжы

У пачатку вялікіх выхадных у Беларусі чэргі на мяжы зноў выраслі - на гэты раз на выезд з краіны. Ужо звыклым стала ацэньваць іх не так у колькасці транспарту, колькі ў гадзінах ці нават сутках. Самая «павольная» мяжа — з Літвой.

Па афіцыйных дадзеных Дзяржпамежкамітэта на 10.00 9 траўня павялічыліся чэргі ў параўнанні з 8 траўня ва ўсіх пунктах пропуску, акрамя «Брэста». Асабліва прыкметна — у пункце «Беняконі».

Пункт пропуска	Легкавыя аўтамабілі	Фуры	Аўтобусы
На выезд у Літву
«Каменны Лог»	180	630	0
«Беняконі»	180	410	0
На выезд в Латвію
«Грыгароўшчына»	120	430	0
На выезд у Польшчу
«Брэст»	400	-	75
"Казловічы"	-	850	-

Да зоны чакання на 10.00 9 траўня чарга на выезд у «Брэсце» складала больш за 280 легкавых машын, у «Беняконях» — больш за 90, у «Каменным Логу» — больш за 15.

Нават пры перасячэнні мяжы з дзіцем да трох гадоў - у такім выпадку машыну павінны прапускаць без чаргі - мяжа займае і тры, і шэсць гадзін. Адна з удзельніц чата, прысвечанага мяжы, спрабуе купіць чаргу «бліжэй да шлагбаўма». За 24 гадзіны праз мяжу ў «Беняконях» змаглі праехаць толькі 200 машын. Вадзіцель, які прыехаў у зону чакання ў «Беняконях» 8 траўня ў 6.30 раніцы, перасек мяжу за 17 гадзін. На літоўскім баку яго чакала «падрабязнае апытанне».

Што з аўтобусамі?

У аўтобуса Мінск-Коўна (праз Вільню), які адправіўся ў 23.30, праходжанне мяжы ў «Каменным Логу» заняло 9 гадзін. З Беларусі ў Літву аўтобусы ўвечары 8 траўня стаялі ад чатырох да амаль шасці гадзін.

Каб хутчэй перасекчы мяжу ў бок Польшчы, пасажыры аўтобусаў мяняюць іх перад пунктам пропуску — перасаджваюцца ў тыя, што стаяць бліжэй да шлагбаўма і дзе ёсць месца. Такая змена транспарта будзе каштаваць ад 30 да 60 еўра. Больш выгадна сядаць у аўтобус на польскіх нумарах — іх прапускаюць па асобным канале. Бывалыя падарожнікі таксама раяць ехаць да Цярэспаля, а ўжо там купляць білет да Варшавы — так выходзіць хутчэй і танней.

«Калі без падсадкі то вельмі доўга… З пасадкай то проста доўга, — напісаў адзін з падарожнікаў пра сітуацыю на выезд з Беларусі ў Польшчу. — Падыходзіў да першых аўтобусаў на 100 метроўцы, больш за суткі ўжо стаяць, пасля шлагбаўма прыкладна 12 гадзін».

Чэргі на ўезд — толькі ў Літве

На ўезд у Беларусь для легкавых аўто чарга ёсць толькі на выездзе з Літвы: у «Шальчынінкаі» («Беняконі») — каля 30 машын і ў «Мядзінінкаі» («Каменны Лог») — больш за 170, паведамляюць у адным з чатаў, прысвечаным перасячэнню межы Беларусі з Еўрасаюзам. У Брэсце абодва пункты пропуску на выезд з Польшчы ў аднаго з кіроўцаў на легкавой машыне занялі 1 гадзіну 20 хвілін.

У кіроўцы, які прыехаў на пункт пропуску ў Мядзінінкаі яшчэ вечарам 7 траўня, праходжанне мяжы ў бок Беларусі заняло 25 гадзін. У іншага кіроўцы — 26. Увечары 8 траўня кіроўцы ацэньвалі чаргу ў 30−35 гадзін.

Чытайце таксама: Адзін з кіраўнікоў польскага парламента хоча адкрыць закрытую мяжу паміж Гроднам і Беластокам

У чарзе на ўезд — «транзітнікі»

Многія машыны, якія стаяць у чарзе на ўезд у Беларусь з Літвы, прызначаны для продажу, з транзітнымі нумарамі. «Лт-рб да шлагбаўма 30 машын, усе транзітныя, пару машын літоўскіх», — напісала адна з удзельніц «памежнага» чата. Часам людзі, якія едуць у Беларусь, нават могуць іх аб’ехаць. «У іх сваё жыццё на мяжы. Яны чакаюць дакументы, стаяць маўчаць. Мы прайшлі спыталі і аб’ехалі машын 10», — піша іншы ўдзельнік чата. Адзначаюць, што шмат машын стаіць нават без кіроўцы.