Мост на Філарэта ў Гродне небяспечны — рух па ім мусілі абмежаваць яшчэ ў мінулым годзе

Мост праз Юрысдыку на вуліцы Філарэта (былая Горкага) ў Гродне чакае капітальны рамонт. У час яго там хочуць узмацніць або замяніць пралётнае збудаванне моста. Рух на ім рэкамендавалі абмежаваць пасля абследавання моста восенню 2023 года.

Цяперашні мост быў збудаваны ў 1993 годзе. Ён жалезабетонны, арачны, аднапралётны. Яго даўжыня — 59,44 м, шырыня праезнай часткі - 9,9 м, вышыня ад узроўню вады — 7,38 м.

На тое, што Гродзенская гарадская жыллёва-камунальная гаспадарка шукала выканаўцу для стварэння перадпраектнай дакументацыі для капітальнага рамонту моста звярнуў увагу канал Urban Hrodna. За распрацоўку дакументацыі гатовы былі заплаціць 167,9 тыс. руб. Дакументы планавалі атрымаць і ўзгадніць ва ўсіх патрэбных інстанцыях цягам шасці месяцаў (з 8 траўня па 5 лістапада 2024 года). Першая закупка засталася няздзейсненай, зараз абвешчана новая.

У перадпраектнай дакументацыі трэба будзе прапрацаваць варыянты рэканструкцыі, вызначыць яе кошт і палічыць перспектыўную інтэнсіўнасць транспартнага руху. Сродкі на распрацоўку дакументаў планавалі ўзяць з гарадскога бюджэту. Рамонт моста збіраліся завяршыць у 2025 годзе.

Рух трэба абмежаваць. Што не так з мостам?

Дэтальнае абследаванне моста правялі восенню 2023 года. Яго зрабіла УП «Будрэканструкцыя». Дакумент з вынікамі абследавання быў размешчаны ў дзяржзакупцы: на яго аснове варта рабіць перадпраектную дакументацыю.

У час абследавання знайшлі дэфекты і пашкоджанні розных частак моста і зрабілі высновы, што аўтамабільны рух па мосце трэба абмежаваць да іх ліквідацыі.

Сярод дэфектаў, якія выявілі на паверхні моста:

• адсутнасць гарызантальнай дарожнай разметкі палос бяспекі, а дарожная агароджа злева недастатковай вышыні;
• надта тоўсты пласт маставога палатна — нельга класці новыя пласты без прыбірання старых;
• на ходніках прасела пакрыццё, ёсць ямы, вада збіраецца там і на праезнай частцы, месцамі разбурана плітка;
• расколіны на пакрыцці праезнай часткі;
• негерметычныя дэфармацыйныя швы, парушэнне гідраізаляцыі;
• скідванне вады на фасады моста, праз што цярпяць фасадныя аркі і дэкаратыўныя сценкі;
• расколіны да 5 мм у дэкаратыўных парапетах і іх разбурэнне;
• парэнчы лесвіцы надта нізкія і пакрыты карозіяй, бетон пашкоджаны.

У бэльках, якія з’яўляюцца нясучымі канструкцыямі для праезнай часткі, таксама знайшлі праблемы:

• сколы, замшэласць, сталактыты, расколіны ў рэбрах бэлек да 0,3−0,9 мм;
• агаленне і карозія арматуры;
• размарожванне бетону рэбраў каля апораў;
• працяканне вады па маналітным стыку пліт бэлек, праз зборныя накладныя пліты па краях пралётаў, праз мантажныя адтуліны;
• карозія сталёвых куткоў узмацнення апорных участкаў, разбурэнні ў вузле абапірання бэлек;
• зрушэнне восяў абапірання бэлек і іншае.

Самі апорныя часткі дэфармаваныя, іх зуб'і нахіленыя і судакранаюцца. На апорах сабралася смецце, таксама сапсаваўся бетон і аголеная арматура. На апорах праезнай часткі - расколіны 0,3 мм і больш, замшэласці, сколы, працякае вада, аголеная арматура.

Адхоны рэчышча Юрысдыкі зруйнаваліся, адхоны насыпу і грунт пад апорамі размываюцца. Дэкаратыўныя сценкі ўнізе моста мокнуць, на іх утварыліся сталактыты, грунт пад імі размыла, утварыліся трэшчыны да 10 мм. Пад мостам засталіся рэшткі разбураных канструкцый. У бетонным кальцы праёму з’явілася расколіна да 0,5 мм.

Выявілася, што трываласць бетону канструкцый арак збудавання не адпавядае вызначанай у сучасных нарматывах.

Нагрузку на мост ужо трэба зменшыць

Пасля абследавання рэкамендавалі не пазней як да канца 2023 года абмежаваць нагрузку на мост — забараніць праязджаць па ім транспарту вагой больш за 12 тон і зменшыць максімальную хуткасць на ім да 30 км/г.

Таксама для змяншэння нагрузкі рэкамендавалі арганізаваць рух транспарту па спецыяльна выдзеленай паласе шырынёй 7 м, зрушанай да левай агароджы, а рух пешаходаў скіраваць па правым тратуары і па спецыяльна выдзеленай паласе шырынёй у 2 м, зрушанай да праезнай часткі на левым тратуары. Клумбу злева параілі прыбраць.

На мосце нельга дапускаць скапленні людзей у час масавых мерапрыемстваў, а стан апорных канструкцый праезнай часткі збудавання трэба кантраляваць раз на месяц.

Рэкамендаваныя абмежаванні сапраўды ўвялі ў канцы 2023 года — тады патлумачылі, што для маніторынгу.

Мост адрамантаваць, дрэвы — высекчы

Абследаванне паказала, што мосту патрэбны капітальны рамонт. У час яго належыць як мінімум:

• пераўладкаваць з улікам сучасных нормаў маставое палатно, засыпанне арачнага пралётнага збудавання і спалучэнне моста з падыходамі;
• узмацніць ці замяніць бэлькі праезнай часткі;
• уладкаваць маналітную накладную пліту ўзмацнення і вынесці дэфармацыйныя швы за асновы;
• замяніць усе апорныя часткі;
• адрамантаваць апорныя канструкцыі праезнай часткі, аркі пралётнага збудавання і рэчышча ракі пад мостам;
• узмацніць ці перабудаваць дэкаратыўныя сцены моста;
• адрамантаваць гідраізаляцыю, ачысціць і пафарбаваць паверхні;
• прыбраць з падмоставай прасторы разбураныя канструкцыі, спланаваць і ўмацаваць там адхоны.

Таксама рэкамендавана высекчы ўсю расліннасць ў межах 50 м ад моста і ачысціць падмоставую зону, каб вада вальней праходзіла пры паводках.

Чытайце таксама:

• Румлёўскі мост зноў будуць рамантаваць — да траўня абмяжуюць рух пешаходаў
• Пешаходны мост на Фамічова цалкам разбяруць і збудуюць новы