Макароны стала есці даражэй, але праезд на цягніках патаннеў. Што вядома пра інфляцыю і цэны ў лютым 2024 года

У лютым 2024 года больш за ўсё ў Гродзенскай вобласці змяніліся цэны на турыстычныя паслугі. Яны выраслі на 13,7% у параўнанні са студзенем, паведаміла Галоўнае статыстычнае ўпраўленне Гродзенскай вобласці.

На другім месцы па росце цэнаў - жыллёва-камунальныя паслугі. За месяц цана вырасла на 6%. Толькі ў сферы чыгуначнага транспарту цэны знізіліся на 2,4%.

Сярод харчовых тавараў найбольш выраслі цэны на макаронныя вырабы — 3,9% і на алкаголь — 3%. Адзіныя пазіцыі, якія сталі танней — гародніна на 1,5% і мыючыя сродкі на 2,1%.

За год інфляцыя склала больш чым 6%

За перыяд з лютага 2023 па люты 2024 год цэны ў Гродзенскай вобласці цэны змяніліся:

• на харчовыя тавары выраслі на 6,1%;
• на нехарчовыя тавары выраслі 3,3%;
• у сферы паслугаў выраслі на 6,8%.

Па Беларусі сітуацыя падобная

Агулам па Беларусі сітуацыя з цэнамі аналагічная. Паслугі ў сферы турызму выраслі ў цане на 7,7%. Таксама выраслі цэны за камунальныя паслугі на 6%.

Летась інфляцыя ў Беларусі склала 5,8%. У 2022 годзе інфляцыя склала 12,8%, а ў 2021 — 10%. У 2024 годзе яе паспрабуюць утрымаць на ўзроўні 6%. Але пры такіх тэмпах росту як зараз, верагодна, гэты паказальнік цэны пераадолеюць у першай палове 2024 года.

Чытайце таксама: Гуркі таннейшыя ў Вільні, апельсіны ў Беластоку, а яблыкі ў Гродне. Параўналі кошты на «вітаміны» ў канцы зімы