Кавярня Black Fox Coffee працуе на Курчатава, 27 з пачатку снежня 2023 года. Там падаюць каву з Гандураса, робяць вячэрнія скідкі на выпечку, а яшчэ туды пускаюць з жывёламі.
Black Fox Coffee — невялікая кавярня з лаканічным інтэр'ерам. У зале стаяць маленькія круглыя столікі на дваіх, ёсць стойка ля акна з адзіночнымі высокімі крэсламі. Сцены ўпрыгожаны фірмовай выявай белай лісы на чорным фоне.
«На Дзевятоўцы адкрылася новая кавярня. Цяпер можна не ехаць у цэнтр, каб сустрэцца з сяброўкай», — піша адна з наведвальніц у Instagram. «Вельмі чакала, калі на Дзевятоўцы з’явіцца кавярня», — піша іншая. Многія наведвальнікі ў сваіх сторы ў Instagram адзначаюць зручнасць, калі пад домам у спальным раёне ёсць кавярня.
Кавярня pet-friendly — гэта значыць, туды можна прыйсці з хатнім улюбёнцам. Уладальнікі заклікаюць не пакідаць сабак на вуліцы, нават калі вы забеглі на хвіліну, каб узяць каву з сабой.
Кава і какава — ад вядомага беларускага пастаўшчыка
Кававае зерне ва ўстанову пастаўляе беларускі вытворца Single Step. Гэтую каву вы маглі каштаваць у кавярнях Soul Coffee (былая «Наша кава»), Sprava, Cup&Cake і «Наше место». У Black Fox Coffee вараць каву з зерняў серыі Balance з Гандураса.
Для гэтай кавы характэрна аксаміцістая структура, яблычная кіслотнасць з ноткамі запечанага яблыка і слівы. Кіслотнасць збалансавана ў пражанні з саладосцю, адценнямі карамелі і дэсертнага шакаладу.
Ад гэтага ж пастаўшчыка і какава ва ўстанове. На выбар чатыры віды цёртай какавы: Colombia Cooagronevada Organic, Niagara O’tuma Organic, Peru Amazonas Organic, Indonesia Bali Jembrana.
Чытайце таксама: Стала вядома, калі ў Гродне пройдзе Gastrofest.Кава 2024: глядзіце спіс сэтаў
Выпечка ва ўстанове ад прыватнай гродзенскай пякарні «Хлебная крама». Перш за ўсё, гэта круасаны — іх цэлых восем відаў. Ёсць як салодкія, так і з мясам, курыцай ці рыбай. Ёсць і іншыя дэсерты накшталт заварнога кола ці торта. Пасля 20.00 на выпечку дзейнічае скідка 20%.
Цэны ў Black Fox Coffee
Кававая класіка ў новай кавярні на Дзевятоўцы каштуе ад 4 да 7 рублёў. Аўтарская кава з цікавымі назвамі: капуЧилли, АрехАвАя капучинА, шокобУм і іншыя — ад 6 да 10 рублёў. Какаву можна замовіць за 8 ці 10 рублёў.
Ёсць некалькі відаў гарбаты і матча — кошты на іх ад 4 да 7 рублёў. Круасаны каштуюць ад 3,5 да 12 рублёў у залежнасці ад начыння.
За альтэрнатыўнае малако вас папросяць даплаціць 2 рублі.
У кавярні таксама можна купіць дрып-каву ад Single Step. Дрып-пакеты — гэта аднаразовыя пакуначкі з молатай кавай унутры. З іх дапамогай можна прыгатаваць любімы тып кавы дома ці ў любым іншым месцы.
Дзе знаходзіцца Black Fox Coffee
Адрас: Курчатава, 27 (скрыжаванне з вуліцай Дзяржынскага, побач з крамай «Капеечка»)
Час працы:
- Буднія — 09.00 — 22.00
- Выхадныя- 10:00 — 22:00
Чытайце таксама: У Гродне будуць абсмажваць каву для ўсёй Беларусі: дзе яе можна будзе купіць
