Сітуацыя ў пункце "Мядзінінкай" 10 лістапада. Крыніца: адзін з чатаў, прысвечаны перасячэнню мяжы з ЕС.
На літоўскіх пунктах пропуску на мяжы з Беларуссю змяніўся прынцып перасячэння граніцы. Раней для тых, хто ехаў на веласіпедах, была асобная чарга. Гэта дазваляла зэканоміць час і не чакаць гадзінамі разам з аўтамабілямі. Зараз літоўскія памежнікі ставяць веласіпедыстаў у агульную чаргу паміж машынамі.
9 лістапада ў пункце пропуску «Шальчынінкай» («Беняконі») памежнікі ставілі ў агульную чаргу толькі раварыстаў з беларускімі пашпартамі. Уладальнікі літоўскіх пашпартоў, як і раней, праязджалі паводле асобнай чаргі, не чакаючы разам з машынамі. Такая інфармацыя з’явілася ў адным з чатаў, прысвечаных перасячэнню мяжы з Еўрасаюзам.
Раварыстаў адпраўляюць у агульную чаргу з аўтамабілямі ў літоўскіх пунктах пропуску «Райгардас» («Прывалка») і «Шальчынінкай», піша «Авто Гродно» са спасылкай на інфармацыю ад чытачоў. Гэта ініцыятыва менавіта літоўскага боку. Да гэтага ў пункце «Шальчынінкай» усяго некалькі месяцаў таму літоўцы ўсталявалі знак «Месца чакання для пешаходаў/раварыстаў». Ён з’явіўся побач з будкамі памежнікаў. Трэба было пад’язджаць пад знак і стаяць, пакуль не паклічуць. Падобна, з 9 лістапада знак прыбралі.
У пункце пропуску «Мядзінінкай» («Каменны Лог») раварыстаў ставілі ў агульную чаргу з машынамі, ужо 10 лістапада, напісалі ў «памежным» чаце. Пры гэтым адзін з удзельнікаў таго ж чата пазней напісаў, што ў гэты дзень зменаў па праездзе раварыстаў не было.
У пункце «Райгардас» («Прывалка») праблемы з пропускам раварыстаў па-за чаргой ужо былі ў траўні 2023 года. Літоўскія памежнікі спасылаліся на нядаўнія змены ва ўнутраных правілах. Ровары чаргавалі з машынамі ў чарзе па тры праз тры. На наступны дзень пасля новаўвядзення праходжанне мяжы на ровары займала ўжо каля 5 гадзін. А вось аўто пачалі праходзіць мяжу крыху хутчэй. Праз нейкі час абмежаванне знялі.
Опцыяй перасячэння мяжы на ровары часта карыстаюцца тыя, хто ездзіць па закупы, і дальнабойшчыкі, якія працуюць за мяжой і хочуць хутчэй патрапіць дадому. Апошнія пад’язджалі на машыне ці на фуры і каля самай мяжы змянялі транспарт: па абодва бакі звычайна прымацавана шмат пакінутых ровараў. Змены ў перасячэнні мяжы маглі ўвесці праз скаргі кіроўцаў, якія стаяць на машынах і маршрутках у чарзе.
«Нейтралка вузкая ў адзін пас для легкавых, не аб’едзеш. Там сапраўды за дзень маглі праехаць 100 раварыстаў і толькі 20−30 машын. Чым і карысталіся тыя, хто на перакідзе тавара, за дзень ездзілі 2−4 разы», — тлумачыў чытач Hrodna.life.
Перасякаць мяжу на роварах дазволена на літоўскіх пераходах, на пераходзе ў Польшчу «Брэст-Цярэспаль» — такой магчымасці няма. Перасякаць мяжу на самакатах забаранілі яшчэ восенню 2022 года. Праз змены ў Правілы дарожнага руху ў Беларусі іх перасталі лічыць транспартным сродкам.
Беларускі бок па-свойму «змагаецца» з раварыстамі: прыпаркаваныя каля мяжы дзясяткі ровараў час ад часу цэнтралізавана зразаюць і вывозяць. У Гродне забіраць свой транспарт прапаноўвалі ў Гродзенскім раённым аддзеле міліцыі на Азёрскай шашы. Для гэтага трэба было прадставіць доказы валодання веласіпедам.
Чытайце таксама: Беларусы больш не змогуць памяняць пашпарт за мяжой (абноўлена)
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…
Маршрут праз усю Беларусь запусціла гродзенская фірма "Пазітыў-тур". Шлях з Гродна ў Віцебск складзе амаль…