Затрымалі выкладчыкаў, судзілі майстра ЖКГ, распачалі 2000 спраў. Як прайшоў тыдзень у Гродне і вобласці

У Ваўкавыску затрымалі двух выкладчыкаў. За распаўсюд экстрэмісцкіх матэрыялаў судзілі майстра ЖКГ, беспрацоўнага, супрацоўніка «Белкард». 2000 «экстрэмісцкіх» злачынстваў распачалі ў Гродзенскай вобласці. Рэдакцыя Hrodna.life вывучыла, што адбылося ў вобласці з 30 кастрычніка 5 лістапада.

Затрымалі выкладчыкаў

У Ваўкавыску затрымалі двух выкладчыкаў у гімназіі № 1 Ваўкавыска, паведаміў 30 кастрычніка Telegram-канал «Суды, задержания. Гродно и область».

Новая экстрэмісцкая інфармацыя

Суд Лідскага раёна Гродзенскай вобласці 27 кастрычніка 2023 года прызнаў экстрэмісцкімі:

• Telegram-канал «Беларускае Радыё Рацыя»;
• Facebook-акаўнт «Беларускае Радыё Рацыя», а таксама іх лагатыпы ў выглядзе схематычнага малюнка герба «Пагоня» залацістага колеру на бела-чырвоным фоне;
• Telegram-канал «ХАДАНОВIЧ I CHADANOVIC»;
• Telegram-канал «Андрэй Хадановiч»;
• Лагатып Telegram-канала «ХАДАНОВIЧ I CHADANOVIC у выглядзе малюнка круга, які складаецца з чатырох трыкутнікаў розных колераў.

Як судзілі за распаўсюд экстрэмісцкіх матэрыялаў

16 кастрычніка ў судзе Навагрудскага раёна па арт. 19.11 КаАП судзілі майстра ЖКГ. Ён нібыта распаўсюджваў у «Одноклассники» экстрэмісцкі лагатып. Мужчыну чакае штраф у 30 базавых велічынь (1110 рублёў) з канфіскацыяй мабільнага тэлефона.

У судзе Воранаўскага раёна асудзілі мясцовага жыхара. 17 кастрычніка разгледзелі справу паводле ч. 2 арт.19.11 КаАП у дачыненні да часова беспрацоўнага. Ён быў падпісаны на экстрэмісцкую прадукцыю ў Instagram. Хлопец заплаціць штраф у памеры 25 базавых велічынь (925 рублёў) без канфіскацыі мабільнага тэлефона.

Затрыманне ў Гродне

Гродзенца затрымалі за ўдзел у масавых пратэстах у верасні 2020 года і распаўсюд экстрэмісцкіх матэрыялаў. Хлопец сцвярджае, што рабіў гэта па няведанні. Яго затрымалі дома.

Затрыманага 27 кастрычніка на «Лідскае піва» аштрафавалі

Паводле арт. 19.11 КаАП у судзе Лідскага раёна мужчыну аштрафавалі на 30 базавых (1100 рублёў). Яго тэлефон канфіскавалі, паведаміў Telegram-канал «Задержания, суды в Лиде».

Затрыманага абвінавацілі ў падпісцы ў Instagram на канал Zerkalo. Ён падпісаўся на яго ў 2020 годзе, калі канал яшчэ не быў прызнаны экстрэмісцкім. Да суда затрыманы знаходзіўся ў Лідскім ІЧУ і яго вазілі перабіраць смецце ў в. Сяркова.

Мясцовы фонд падтрымкі вынаходнікаў «Прынёманская Братчына» знаходзіцца ў стадыі ліквідацыі

Так вырашыў Эканамічны суд Мінска 6 кастрычніка (так напісана ў АДР, але ліквідацыя была праз Гродзенскі абласны суд. Магчыма, гэта памылка). Фонд быў зарэгістраваны ў Лідзе і прапрацаваў 13 гадоў, паведамляе Telegram-канал «Право имеют».

У Гродне аштрафавалі супрацоўніка «Белкард»

Работніка судзілі паводле арт. 19.11 КаАП за распаўсюд экстрэмісцкіх матэрыялаў. Ён атрымаў штраф у 30 базавых велічынь (1100 рублёў). Пра гэта распавялі ў Telegram-канале прадпрыемства.

Новыя «экстрэмісты»

Сакалоў Сяргей Анатольевіч з Ліды 3 лістапада папоўніў «спіс экстрэмістаў».

Анджэю Пачобуту прысудзілі польскую праваабарончую прэмію

У Кракаве адбылася 20-я цырымонія ўручэння польскай прэміі імя Сержыу Віейра дзі Мелу — Вярхоўнага камісара ААН па правах чалавека. Прэмія была заснаваная ў 2003 годзе культурна-асветніцкім таварыствам «Віла Дэцыус». Яна прысуджаецца людзям і няўрадавым арганізацыям за іх дзейнасць у галіне абароны правоў чалавека, а таксама папулярызацыю ідэі мірнага суіснавання і супрацоўніцтва розных таварыстваў, рэлігій і культур.

Лаўрэатам ганаровай узнагароды стаў гродзенскі журналіст, дзеяч польскай меншасці ў Беларусі, палітвязень Анджэй Пачобут, піша «Гарадзенская праваабарона» са спасылкай на Беларускую службу Польскага радыё.

«Не сакрэт, што яму прапаноўвалі вызваленне ў абмен на эміграцыю ў Польшчу, але ні на якія здзелкі з рэжымам Андрэй не пайшоў. Гэта прыклад чалавека, які не хістаецца нават перад абліччам сваіх катаў», — сказала старшыня праўлення Падляшскага аддзялення Wspólnota Polska Анна Кетлыньска, якая атрымала ўзнагароду ад яго імя.

Сілавікі затрымалі супрацоўнікаў дзяржпрадпрыемства ў Шчучыне

На працягу двух дзён сілавікі затрымалі супрацоўнікаў у філіяле «Аўтапарк № 12 г.Шчучын». Прычынай стала распаўсюджванне экстрэмісцкіх матэрыялаў у інтэрнэце. Пра гэта распавялі ў мясцовым Telegram-канале, які вядуць сілавікі. Колькі чалавек затрымалі, не паведамляецца.

Эксперты плануюць вывучаць беларускую турэмную медыцыну

Беларускія юрысты, медыкі і псіхолагі аб’ядналіся, каб вывучыць, як функцыянуе турэмная медыцына і псіхалогія ў Беларусі. Удзельнікі праекта Physicians for truth and justice плануюць збіраць і аналізаваць экспертныя заключэнні, а таксама распрацоўваць прапановы па змене пенітэнцыярнай сістэмы (сістэма выканання пакаранняў). Мэта ў тым, каб правы зняволеных выконваліся.

Суддзя з Гродна сышоў з працы па ўласным жаданні

Сяргей Слашчоў быў суддзёй суда Кастрычніцкага раёна Гродна з 2020 года. Ён быў прызначаны на пяць гадоў - але сышоў з пасады па ўласным жаданні. Гэта нетыповая сітуацыя. Мужчына не выносіў «палітычныя» рашэнні і прысуды. Пра гэта стала вядома з Указа № 339 аб прызначэнні і вызваленні суддзяў, які падпісаў 2 лістапада Аляксандр Лукашэнка.

Другое месца пасля Мінска. 2000 «экстрэмісцкіх» злачынстваў узбудзілі ў Гродзенскай вобласці

У Гродзенскай вобласці з 2020 года зарэгістравалі каля 2000 злачынстваў «экстрэмісцкай» накіраванасці. Гэта другі паказчык па краіне пасля Мінска. Там выявілі больш за 6000 злачынстваў. У Віцебскім і Магілёўскім рэгіёнах — па 1000. У Беларусі ж з 2020 года здзейснілі каля 16 000 злачынстваў.

Валізка з фарбамі і вера ў лепшае. Як гродзенка перавозіла рамесную майстэрню ў іншую краіну

Ад’езд гродзенскай сям'і Енджэеўскіх не быў ані запланаваным, ані жаданым. З сабой Кацярына Еўдакімава-Енджэеўская забрала валізку фарбаў для дзіцячых цацак, якія яна рабіла з дрэва ў Гродне. На іх паспела вырасці пакаленне дзетак, расказала Кацярына для «Радыё Свабода». Майстрыца змагла перавезці сваю справу ў іншую краіну. На зборы было два тыдні.