У Гродне рыхтуюць праект для шлагбаума, які ўжо стаіць. Колькі ён каштуе?

Гродзенская гарадская жыллёва-камунальная гаспадарка замовіла распрацоўку праекта для шлагбаума на Дамініканскай, 3. Але адзін шлагбаум на гэтым месцы ўжо з’явіўся сёлета ў канцы красавіка. У ЖКГ кажуць, што другі там ставіць не плануюць.

Шлагбаум на Дамініканскай, 3 паставілі ў красавіку 2023 года, каб абмежаваць староннему транспарту доступ да праезду на вуліцу Савецкую, растлумачылі тады ў ДАІ. Гэта мусіла гарантаваць большую бяспеку пешаходам у гістарычнай частцы горада. Тыднем раней новы шлагбаўм усталявалі і на вуліцы Калючынскай каля кафэ «Паляна».

Заяўка на стварэнне праектнай дакументацыі па аб’екце «Добраўпарадкаванне тэрыторыі, прылеглай да будынка па вул.Дамініканскай, 3 у г. Гродна, з устаноўкай аўтаматычнага шлагбаўма» на сайце дзяржзакупак з’явілася ў жніўні 2023 года. На яе распрацоўку плануюць выдаткаваць 3185,99 рублёў з гарадскога бюджэта.

Пры тым яшчэ адзін шлагбаум у гэтым месцы ставіць не збіраюцца, піша канал Urban Hrodna. Магчыма, закупка звязаная з рэканструкцыяй ці мадэрнізацыяй ужо існага шлагбаума, сказалі ў аддзеле добраўпарадкавання Гродзенскай гарадской ЖКГ. Хаця ў дакументах гаворка ідзе менавіта пра ўстаноўку абсталявання.

У заяўцы пазначана, што трэба распрацаваць праектную дакументацыю на электразабеспячэнне,
сабраць дадатковыя зыходныя дадзеныя і ўзгадніць праект. Паводле задання на праектаванне, у ім трэба ўлічыць:

• разборку асвальтабетоннага пакрыцця і пліткі на ходніку,
• земляныя працы,
• пракладку 44 м кабеля,
• устаноўку аўтаматычнага шлагбаума,
• аднаўленне пакрыцця,
• уладкаванне электразабеспячэння і аўтаномную наладку шлагбаума.

Нагодай для праектавання пазначаны ліст з УВД УДАІ Гродзенскага аблвыканкама ажно ад 23 студзеня 2023 г. — амаль за тры месяцы да ўстаноўкі цяперашняга шлагбаума. Дата дазволу на праектна-вышукавыя працы і будаўніцтва ад Гродзенскага гарвыканкама — ад 10 ліпеня 2023 г. Праект трэба падрыхтаваць з 14 жніўня да 29 верасня. Будаўнічыя працы паводле дакументаў запланаваныя на верасень.

Чытайце таксама:

• Дом афіцэраў на Ажэшкі рыхтуюць да рэканструкцыі: анансавалі грамадскія абмеркаванні
• Аднаўленне Фары Вітаўта — «блюзнерства», а лёс гасцініцы «Гродна» вырашаць у Кітаі. Што Уладзімір Каранік сказаў падчас прамога эфіру