Фотастудыя Prastora змяніла ўласніка. Людкевіч расказаў, чаму з’ехаў і хто яго змяняе

Гродзенскі фатограф Сяргей Людкевіч прадаў сваю фотастудыю Prastora. Яна размяшчаецца у Доме Быта на вуліцы Замкавая, 3. Новы ўладальнік фотастудыі - фатографка Таццяна Раманкова, паведаміў Людкевіч на сваёй старонцы ў Instagram.

«Так, я прадаў сваё дзецішча, сваю любімую фотастудыю Prastora, у якую ўкладаў усе сілы апошнія два гады. Але жыццё і абставіны прымушаюць рухацца далей і ўсё змяняць, — напісаў у Instagram фатограф Сяргей Людкевіч. — А я пайду далей па жыцці і буду працягваць развівацца і радаваць вас крутымі фотаздымкамі і відэа.

Чым займалася фотастудыя

Фотастудыю Prastora Сяргей Людкевіч адкрыў у кастрычніку 2021 года. Там рабілі фотасэсіі, вясельныя фота, фота цяжарных, навагоднія фотасэсіі. Плошча памяшкання больш за 100 кв.м. Там ёсць грымёрная і зона чакання.

Новая ўладальніца студыі Таццяна Раманкова таксама робіць сямейныя фотасэсіі і фатаграфуе цяжарных жанчын. «Яна працягне маю справу і паверце, там будзе шмат класнага. Таму: Таню не крыўдзіць!!», — напісаў Людкевіч.

Чаму Людкевіч з’ехаў з Беларусі

Сяргей Людкевіч здымае 10 гадоў. Пераважна займаецца рэпартажнай, партрэтнай і камерцыйнай здымкай. Цікавіцца арт-фатаграфіяй. Супрацоўнічаў з брэндамі Renualt Ukraine, Jeep Ukraine, WWF Ukraine, Ukrlandfarming, часопісамі «Вокруг Света» і «Власть Денег». Удзельнічаў у фотавыставах у Беларусі, Ізраілі, Расіі.

9 жніўня 2020 года яго затрымалі, калі ён здымаў вулічнае мерапрыемства. Тады яго абвінавацілі ва ўдзеле ў несанкцыяваным мерапрыемстве і прысудзілі 15 базавых велічынь.

13 ліпеня 2023 года Людкевіч паведаміў, што новы этап жыцця ён назаве «Еўропа» і пачне яго ў бельгійскім Брусэлі.

Чытайце таксама: «Поўная свабода творчасці». У Гродне адкрылася новая фотастудыя-«канструктар» з жывой фотазонай