На свята Дня Незалежнасці 3 ліпеня ў Гродне збіраюцца запусціць феерверк з элементамі лазернага шоу. Яго запусцяць з даху Гродзенскага гарвыканкама. Колеры, шумавыя і светлавыя эфекты ўзгодняць з уладамі. Але закупка можа не адбыцца: адзін з патэнцыйных удзельнікаў просіць адмяніць яе і прызначыць новую. Ён паскардзіўся ў Міністэрства антыманапольнага рэгулявання і гандлю.
UPD 19 чэрвеня. У разглядзе скаргі адмоўлена, бо яна «не адпавядае патрабаванням». Між тым, аўкцыён прызналі несапраўдным — заяўку падаў толькі ТАА «Белы тыгр». Прызначылі новы.
На працягу сямі хвілін будуць запускаць рымскія свечкі, веерныя і прамыя салютныя ўстаноўкі, адзінкавыя стрэлы, піратэхнічныя шэрагі. З ім будзе музычнае суправаджэнне.
Лазернае шоу правядуць ля будынка гарвыканкама. За чатыры хвіліны пакажуць праекцыі з дапамогай лазерных праектараў, экрана і генератараў шуму.
Усё гэта будзе каштаваць 16 500 рублёў. З іх 10 000 рублёў пойдуць на феерверк, а 6500 — на лазернае шоу.
Гэта крыху даражэй, чым у мінулым годзе — тады феерверк каштаваў 15 000 рублёў.
Пакуль Гродзенскі гарадскі цэнтр для забеспячэння дзейнасці бюджэтных арганізацый праводзіць запыт цэнавых прапаноў.
Што яшчэ трэба?
Заказчык просіць ліцэнзію Дзяржпрамнагляду на права правядзення салютаў з выкарыстаннем піратэхнічных вырабаў IV-V класаў небяспекі, патрэбныя сертыфікаты і страхавыя полісы.
У чым парушэнне?
ПУП «АртСалют» паскардзіўся на Гродзенскі гарадскі цэнтр для забеспячэння дзейнасці бюджэтных арганізацый у Міністэрства антыманапольнага рэгулявання і гандлю. У фірме лічаць, што ў закупцы штучна аб’ядналі піратэхнічнае і лазернае шоу.
АртСалют — мінская фірма. Займаюцца арганізацыяй салютаў любога класа. Працуюць больш за восем гадоў. Называюць сябе адным з лідэраў рынку, гарантуюць высокую якасць паслуг і ўмераныя цэны на салюты. Днямі іх транспарт праверыў МНС — парушэнняў не выявілі.
На думку дырэктара, заказчык парушыў п. 6 арт.20 «Апісанне прадмета дзяржаўнай закупкі» Закона ад 13 ліпеня 2012 г. № 419-З «Аб дзяржаўных закупках тавараў (работ, паслуг)». Гэтым парушылі правы «АртСалют» і паставілі іх у няроўныя ўмовы. Дырэктар сцвярджае, што:
- лазернае шоу адносіцца да неліцэнзійнага віду дзейнасці, а піратэхнічнае шоу ліцэнзуецца і патрабуе спецыяльных узгадненняў і дазволаў;
- тэхналагічна і функцыянальна лазернае і піратэхнічнае шоу не звязаныя паміж сабой. Яны аб’яднаны толькі музычным матэрыялам гукавога суправаджэння мерапрыемства.
Дырэктар просіць адмяніць закупку і прызначыць новую — па двух асобных лотах лазернага і піратэхнічнага шоу.
У закупках ёсць махлярства?
Ініцыятыва «БелДзяржРаспіл» распавядала пра закупку феерверку ў верасні 2022 года Гродзенскім гарадскім цэнтрам культуры. Да конкурсу дапусцілі тры кампаніі: ПУП «АртСалют», ТАА «Белы тыгр» і ТАА «Вогненны Фенікс». Апошнія дзве фірмы зарэгістраваныя па адным і тым жа адрасе.
«АртСалют» зрабіла самую выгадную прапанову — 14 500 рублёў. У той час як заяўка ад «Белага Тыгра» склала 14 660 рублёў, а ад «Вогненнага Фенікса» — 16 000 рублёў. Але выбралі «Белы тыгр».
«І гэта — нахабнае і зусім відавочнае парушэнне заканадаўства. У працэдуры запыту цэнавых прапаноў пераможца выбіраецца выключна па цане. Немагчыма апраўдаць іншы выбар, напрыклад, колькасцю залпаў або лепшай якасцю зарадаў, усё гэта павінна быць вельмі дакладна прапісана ў тэхнічным заданні. Ніякай „бальнай“ ацэнкі не можа быць. У дадзеным выпадку мы бачым відавочнае парушэнне і выбар „патрэбнага“ выканаўцы. < … > Становіцца відавочным, што ў кампаніі ў Гродне ёсць „патрэбныя сувязі“, якія дазваляюць рэалізоўваць незаконныя здзелкі, атрымліваючы доступ да бюджэтных сродкаў», — робяць выснову расследавальнікі.
