Фота ілюстрацыйнае: pexels.com, Lindsey Garrett
На базе адпачынку «Прывал» адначасова з пераправай праз Нёман на аснове баржы вырашылі ўладкаваць яшчэ і сажалку для гадавання стронгі. Пераправа мусіць злучыць два берагі Нёмана ў Пышках. Раней абмяркоўвалі магчымасць пабудовы там велапешаходнага моста, які мог бы быць даступны і для гараджан. Планы па развядзенні стронгі «табачка» мае ўжо два гады — нарэшце стала вядома, дзе хочуць уладкаваць сажалку.
1000 тон радужнай стронгі ў год збіраюцца вырошчваць у Гродне. Аб’ект на стадыі распрацоўкі прадпраектнай дакументацыі.
Паводле планаў, баржа даўжынёй не менш за 50 м не будзе перакрываць плынь ракі, а размесціцца ўздоўж берага з боку «Прывала» пад вуглом 45°. Пры патрэбе яна будзе паварочвацца па плыні з дапамогай электралябёдкі. У дно ракі ўмацуюць палі. На супрацьлеглым беразе (на баку Пышкоў) збудуюць пірс даўжынёй 30 м.
На баржы вырашылі ўсталяваць сонечныя панэлі - дадаткова да электразабеспячэння ад «Прывалу». Зараз уласнік «Прывала» — тытунёвая фабрыка «Нёман» — шукае распрацоўшчыка для перадпраектнай дакументацыі.
Шырыня Нёмана ў гэтым месцы 77−80 м.
Пра планы ўладкаваць у гэтым месцы пераправу стала вядома ў сакавіку 2023. На новую дзяржзакупку звярнуў увагу канал Urban Hrodna.
Сажалку для гадавання стронгі хочуць запраектаваць у прыбярэжнай тэрыторыі базы адпачынку «Прывал». Яна будзе памерам 20 на 40 м.
Пра планы гродзенскай «табачкі» гадаваць стронгу стала вядома летам 2021 года. Для гэтага збіраліся ўладкаваць дзве каскадныя сажалкі ў жалезабетонных чашах на ўчастку памерам арыентыровачна 60 на 20 м. Перапад па вышыні мусіў скласці шэсць метраў.
Кошт распрацоўкі перадпраектнай дакументацыі для пераправы і сажалкі ўзнялі да 155 тыс. рублёў (раней для праектавання толькі пераправы закладалі 120 рублёў). Іх выдаткуе са сваіх сродкаў тытунёвая фабрыка. Прапановы ад распрацоўнікаў прымаюць да 30 чэрвеня.
На падрыхтоўку да будоўлі - даследаванне, стварэнне перадпраектнай дакументацыі і справаздачы па АУНА, правядзенне грамадскіх абмеркаванняў і дзяржаўнай экалагічнай экспертызы — адводзяць шэсць месяцаў (раней закладалі тры).
У 2019 годзе ішла гаворка пра пабудову велапешаходнага моста праз Нёман паміж «Прывалам» і ўрочышчам «Пышкі». Яго хацелі зрабіць даўжынёй 190 м і шырынёй 4,75 м. Мост мусіў складацца з трох сталёвых пралётаў і чатырох апор. Пралёт над ракой мусіў быць 130 м, з дзвюма сталёвымі аркамі. Праект прайшоў дзяржэкспертызу. Мост збіраліся пачаць будаваць яшчэ летам 2020 года, але праект заглух.
Мастом маглі б карыстацца не толькі госці «Прывала», але і іншыя пешаходы і раварысты. Якія будуць умовы карыстання баржай — пакуль невядома.
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…
Маршрут праз усю Беларусь запусціла гродзенская фірма "Пазітыў-тур". Шлях з Гродна ў Віцебск складзе амаль…