У Гродне прэзентавалі праект «студэнцкага» рэстарана: вось, дзе яго пабудуюць

На скрыжыванні вуліцы Горкага і бульвара Ленінскага камсамола плануюць пабудаваць рэстаран для студэнтаў. Ён будзе двухпавярховы, а яго плошча складзе 1,4 тыс. кв. м. Праект прэзентавалі 22 траўня 2023 года ва ўпраўленні будаўніцтва, архітэктуры і горадабудаўніцтва Гродзенскага гарвыканкама.

Што будзе ў рэстарацыі

Будучы рэстаран будзе размяшчацца побач з крамай «Фіялка». У ім плануюць размясціць чатыры абедзеныя залы на 40−45 месцаў кожная: дзве на першым паверсе і дзве на другім. Таксама на другім паверсе будуць выхады на тры летнія тэрасы: адна будзе выходізць на БЛК, другая на Горкага, трэцяя — у двор, дзе інвестар павінен пабудаваць дзіцячую пляцоўку. Яе памеры — 15 на 30 м. Там плануюць стварыць неабходную інфраструктуру: горкі, арэлі, сценкі і бяспечнае пакрыццё.

На другім паверсе плануецца стварыць нешта падобнае да фудкорта, дзе будуць прадстаўлены ўстановы з рознымі тыпамі кухні.

Чаму рэстаран можа стаць «студэнцкім»?

Забудоўшчык — гродзенская кампанія «ВТБКОМ» — лічыць, што асноўнымі гасцямі наведнікамі рэстарана стануць студэнты. У ваколіцы знаходзіцца некалькі студэнцкіх інтэрнатаў і медуніверсітэт.

Чытайце таксама: Замест спрэчнага шматпавярховіка на кальцы Горкага-БЛК запланавалі рэстаран

Пабудуюць за год

Калі праект без затрымак пройдзе экспертызы і ўзгадненні, то рэстаран пачнуць будаваць ужо ў канцы 2023 года. Пабудаваць установу плануюць за 12 месяцаў.

Хто будуе рэстаран

У ліпені 2022 года ўчастак побач з крамай «Фіялка» выкупіла гродзенская кампанія «ВТБКОМ». Гэта кампанія валодае гандлёвым цэнтрам на праспекце Касманаўтаў, 11. Зараз там размяшчаецца Burger King, «Додо Пицца», а таксама шэраг крамаў.