Першы калумбарый у Гродне з’явіцца на Аульсе

На гарадскіх могілках у Аульсе пабудуюць першы калумбарый у Гродне і сажалкe-асушальнік. Пры гэтым будаваць крэматорый у Гродне не плануюць, паведамляе «Гродна Плюс».

Могілкі не будуць пашыраць у бок вёскі Путрышкі, як абмяркоўвалі раней. З таго боку з’явіцца сажалка-асушальнік. Яе пабудуюць, каб воды з пахаванняў не маглі трапіць праз лес на вясковую тэрыторыю. Будаўнічыя працы ўжо пачаліся.

Таксама на могілках у Аульсе пабудуюць калумбарый, дзе можна будзе захоўваць урны з прахам пасля крэмацыі. Раней спецыялісты ў сферы пахавальнай справы называлі перспектыўным месцам для пабудовы калумбарыя могілкі «Сакрэт» на праспекце Касманаўтаў. Наяўнасць калумбарыя ў Гродне дазволіць жыхарам значна эканоміць на ўсталяванні будучага помніка.

Аульс пагражаў жыхарам вёскі

Пра падаўжэнне адзіных адкрытых для пахаванняў гродзенскіх могілак у бок Путрышак гаворка ішла ў 2018 годзе. Мясцовыя жыхары былі супраць, і працягваць могілкі пачалі ў іншы бок. Пры будаўніцтве высякалі дрэвы — да жыхароў у нізіну спускаўся могілкавы пясок, а ліўневыя воды траплялі з могілак у агароды. Тады ў ЖКГ патлумачылі, што пасшыраць могілкі няма куды.

У пачатку 2022 года ўлады ўнеслі змены ў праектна-каштарысную дакументацыю праекта могілак у Аульсе. На тэрыторыі другога пускавога комплексу (чаргі) выключылі размяшчэнне месцаў пахавання. Першым і другім участкам было месца каля вёскі Путрышкі, але мясцовыя жыхары былі супраць працягу могілак у іх бок. Дакументамі прадугледзелі сажалку-выпарнік для перахопу сцёкавых водаў з тэрыторыі могілак і водаадвядзенне. Тады будаўнічыя працы планавалі з красавіка па травень 2022 года.

Улетку 2022 года могілкі ўсё ж пачалі пашыраць за кошт поля праз дарогу, якая злучае Путрышкі і Аульс. Новы ўчастак для будаўніцтва і абслугоўвання могілак зойме 20 га. Дзейныя зараз могілкі займаюць больш за 30 га і змяшчаюць больш за 40 тыс. пахаванняў. Гэта самыя буйныя могілкі ў Гродне.

Крэматорый у Гродне быў прадугледжаны генпланам

Яшчэ ў 2020 годзе будаваць крэматорый у Гродне ўсё ж планавалі, хай і ў аддаленай будучыні. Могілкі з дзвюма формамі пахавання (традыцыйнай і прах у скрынях) з перспектыўным (пасля 2030 года) будаўніцтвам крэматорыя прадугледжвалася ў генплане горада. Месца вызначылі справа ад Аульса. Будаўніцтва крэматорыя вырашыла б многія праблемы, ідэю падтрымала і кіраўніцтва горада. Але, як тады патлумачыў першы намеснік старшыні гарвыканкама Андрэй Жук, па законе будаваць яго мае права толькі дзяржава. Таксама яго турбавала тое, што ў рэгіёне шмат рэлігійных канфесій, і крэмацыя можа не прыжыцца.

Чытайце таксама: Кладбище или крематорий? Как Гродно будет хоронить своих мертвецов