У Гродне распрацавалі новую настольную гульню па-беларуску — «Тутэйшыя»

Кампанія OZ супольна з гродзенскай студыяй распрацоўкі настольных гульняў «Кубік» выпусціла новую беларускамоўную гульню «Тутэйшыя». Яна прысвечана вядомым дзеячам культуры.

Аўтары гульні прапануюць уявіць, што межы часу сцерліся, і выбітныя беларусы розных часоў трапілі ў ХХІ стагоддзе: «Што яны ўбачылі і як адрэагавалі? Як прымянілі свой талент і раскрылі свой характар? У настольнай гульні „Тутэйшыя“ вам давядзецца ў ролі знакамітага беларуса адказваць на каверзныя пытанні і адначасова спрабаваць вылічыць, хто з гульцоў з’яўляецца вашым двайніком».

У гульні можна сустрэць 50 выбітных беларусаў розных часоў, і пабыць у ролі кожнага. На картках — выявы такіх беларускіх дзеячаў, як мастак Марк Шагал, паэт Уладзімір Караткевіч, князеўна Анастасія Слуцкая і многія іншыя. Што б расказала Бона Сфорца ў інтэрв'ю для глянцавага часопіса? Які прынт быў бы на цiшотцы ў Вітаўта? Што б рабіла Вера Харужая падчас зомбі-апакаліпсісу? Трэба зразумець, якога дзеяча абралі вашыя сапернікі, а яны павінны адгадаць, хто вы. Выіграе першы, хто знойдзе свайго двайніка.

Пажаданы ўзрост удзельнікаў гульні — ад 14 гадоў, але строгіх абмежаванняў няма. Гуляць адначасова могуць ад 2 да 6 чалавек. Працягласць — 30−45 хвілін — залежыць ад падрыхтаванасці ўдзельнікаў.

У камплект гульні ўваходзіць:

• 50 картак з вядомымі беларусамі;
• 25 картак з пытаннямі;
• 12 карт выбару;
• брашура з кароткімі біаграфіямі;
• карткі «так» і «не»;
• карткі падабаек;
• правілы гульні.

У «Тутэйшых» можна гуляць і па правілах настольнай гульні «Хто я?».

Набыць настолку сабе ці ў падарунак можна у фірмовых крамах сеткі, праз дадатак OZ альбо на сайце OZ.by. Кошт гульні - 33,15 рублёў. На сайце OZ гульня побач з пазначкай «Навінка» займела сцяжок «Лідар продажаў».

Аўтар і кіраўнік праекту — Антон Янкоўскі, дызайнерка і мастачка — Наста Янкоўская, рэдактар і складальнік башуры з правіламі - Дзяніс Вашкевіч. Больш за восем гадоў «Кубік» працаваў афлайн як першая крама-клуб настольных гульняў, паралельна распрацоўваючы настольныя гульні на беларускай мове. Сярод іх — гульня «Паўстанцы», серыя гульняў для вывучэння беларускай мовы «Мова», аўтарскія гульнёвыя карты з дзеячамі ВКЛ, адноўленая калода гродзенскай фабрыкі ігральных карт «Карты Лапіных». Год таму заснавальнікі «Кубіка» вырашылі закрыць краму і цалкам прысвяціць сябе распрацоўцы настольных гульняў.