Спектакль «Монстры на навагодніх канікулах», які падрыхтаваў Гродзенскі гарадскі цэнтр культуры, хоча закрыць Міністэрства культуры. Яго супрацоўнікі прыйшлі з праверкай 21 снежня. Пра гэта паведамілі ў Instagram Тэатральнай майстэрні «КАКТУСС». Зараз стваральнікі спекталя просяць дапамогі гледачоў.
На спектакль абрынулася прарасійская антызаходняя актывістка Вольга Бондарава. На яе думку, вобразы монстраў прапагандуюць нетрадыцыйныя каштоўнасці. Яна і паскардзілася ў Міністэрства.
Стваральнікі спектакля: гэта ўнікальны праект для Гродна
«Усе вы, ведаеце, што мы падрыхтавалі цудоўны навагодні спектакль „Монстры на навагодніх канікулах“. Гэта ўнікальны праект у Гродне! На сцэне працуюць прафесіянальныя артысты і нашыя таленавітыя вучні, будучыя прафесіянальныя артысты. На сённяшні дзень адыграна 12 спектакляў, і ўсе гледачы задаволены, а наперадзе яшчэ 17. Але мы сутыкнуліся, з актывістамі нашай краіны, якія нават не бачылі наш спектакль, а ўжо посцяць абразлівыя пасты (пішуць, што дзесці прастытуткі), пішуць скаргі ў Міністэрства культуры і адміністрацыю прэзідэнта», — напісалі ў Instagram майстэрні.
Як можна падтрымаць тэатр
Аўтары спектаклю кажуць, што ў пастаноўцы падымаюць тэму дабра і зла, талерантнасці, а таксама ўзаемапавагі паміж пакаленнямі. «Мы будучыня нашай краіны! Мы хочам развіваць культуру ў нашай краіне! А вынікае, што нам гэта забараняюць!»
У падтрымку тэатра, аўтары пастановы заклікаюць гледачоў напісаць ліст у Міністэрства культуры. А ў ім — апісаць эмоцыі, якія гледачы атрымалі ад навагодняга спектакля.
Чаму вучыць спектакль — тлумачыць рэжысёр
«Спектакль вучыць талерантнасці. Не важна, якая знешнасць у чалавека, галоўнае — душа! І ўменне любіць! У спектаклі бачныя узаемаадносіны пакаленняў, што бацькі павінны падтрымліваць дзяцей. Нашыя дзеці - гэта будучыня нашай краіны», — напісаў рэжысёр спектакля Аляксей Комлік у каментарах Instagram.
Каму не спадабаліся «Монстры на навагодніх канікулах»
Прарасійскай антызаходняй актывістцы Вользе Бондаравай не спадабалася, што героі амерыканскага сямейнага мультфільма «Монтстры на канікулах» з’яўляюцца ў навагоднім спектаклі. Яна задалася пытаннем:
«Чаму замест нашага Дзеда Мароза Санта-Клаўс, а замест Снягуркі нейкая баба з зялёным тварам? Адкуль узяліся гэты хз хто з сінюшнымі рукамі і другі, які ў бінтах? Чаму ў мужыка вочы абведзеныя чорнымі ценямі? Ён што, адлюстроўвае з сябе труп? Яны ўсе з сябе трупаў малююць? А як гэта і музыка [трэк у стылі індастрыял падчас светавога шоў - Hrodna.life] таксама карэлюецца з Новым Годам — добрым традыцыйным святам усходнеславянскіх народаў? І чаму ні Гродзенская гарадская, ні аблідэялогія палец аб палец не ўдарылі, каб загадзя спыніць гэты трэшняк са светлай назвай „Монстры на канікулах“?».
«Монстры на канікулах» — зусім не пра гвалт і агрэсію
Выглядае на тое, што Бондарава пачала змаганне з тым, пра што ведае няшмат. «Монстры на канікулах» — серыя анімацыйных фільмаў рэжысёра Генадзя Тартакоўскага, якая расказвае пра дачку графа Дракулы Мэвіс і звычайнага хлопца Джоні, якія стварылі монстра-чалавечую сям’ю. Монстры ў кіно — вельмі добрыя, яны самі асцерагаюцца людзей і стараюцца з імі не перасякацца. Праз адрознасць монстраў і людзей мультфільм вучыць талерантнасці і прыняццю іншых.
Важны пасыл усіх частак стужкі (іх знялі ўжо чатыры) — сямейныя каштоўнасці. Псіхолаг Дыяна Садова сцвярджае, што асноўныя тэмы мульціка: сямейныя ўзаемаадносіны, сталенне дзяцей, каштоўнасці сям'і, перажыванне страты, давер паміж бацькамі і дзецьмі. Яна рэкамендуе ўсе часткі да сямейнага прагляду.
Пра тое, што «Монстры на канікулах» вучаць дзяцей традыцыйным каштоўнасцям, пісаў нават рэцэнзент прапагандысцкай «Российской газеты». А кінакрытык Антон Долін называў стужку гуманістычнай і ацэньваў, як найлепшы пункт сямейнага рэпертуара ў час, калі фільм выходзіў у кіно.
