Новы год у сядзібе. Фота: folvark.by/
У «Фальварку каралеўскай дурніцы (рус. — голубики)» Чэрвеньскага раёна Мінскай вобласці арганізавалі навагодняе мерапрыемства. Паводле яго легенды, у фальварку папаўняюць запасы «голубичного» варэння Санта-Клаўс і яго эльфы. Слова «голубичного» прыцягнула актывістку Вольгу Бондараву. Па тлумачэнні аб парушэнні традыцыйных каштоўнасцяў яна звярнулася ў Чэрвеньскі райвыканкам.
У «Фальварку каралеўскай дурніцы» абяцаюць распавесці пра гісторыю збіральніцтва на беларускіх землях, «прыручэнне» дзікай дурніцы з балот і сучасныя тэхналогіі вырошчвання.
У праграме мерапрыемства таксама было запланавана падарожжа на радзіму Хаіма Суціна і Станіслава Манюшкі ў Смілавічы і на радзіму мамы Максіма Багдаговіча і касманаўта Алега Навіцкага ў Чэрвень. Святочны пачастунак — сінія бліны з варэннем з дурніц і духмяны чай на травах.
«У Чэрвеньскім раёне абараняюць нетрадыцыйнага Санта-Клаўса ў якасці галоўнага героя нашага традыцыйнага Новага года. Што? Нацыянальныя традыцыі? Уласныя казачныя персанажы і мілыя сэрцу героі? Толькі не там, дзе зарабляюць бабло! Гандлярам пляваць на нацыянальную самабытнасць, гарантаваную грамадзянам краіны Канстытуцыяй», — вырашыла Вольга і звярнулася ў райвыканкам «па пытанні захавання нацыянальнай самабытнасці, апоры на культурныя і духоўныя традыцыі беларускага народа».
У мерапрыемствах «Фальварка каралеўскай дурніцы» выкарыстоўваюць вобраз Санты Клаўса ў сувязі з тэматычным напрамкам работы аграсядзібы, растлумачылі ў райвыканкаме. Гэта значыць, вырошчваннем ягады. Ніякіх парушэнняў у гэтым райвыканкам не заўважыў.
Таксама чыноўнікі растлумачылі Бондаравай, што ў дзяржаўных установах культуры на навагодніх мерапрыемствах выкарыстоўваюць тыя самыя «традыцыйныя вобразы»: Дзед Мароз, Снягурка, вавёрачка, зайчык, снегавікі, ялінкі, сняжынкі. «Пры ўпрыгожванні населеных пунктаў таксама выкарыстоўваюцца традыцыйныя навагоднія персанажы, казачныя героі нацыянальнага этнасу», — таксама напісана ў адказе.
У далейшым падчас навагодніх і калядных мерапрыемстваў у аграсядзібе будуць выкарыстоўваць «традыцыйных казачных навагодніх персанажаў», паабяцалі Бондаравай у райвыканкаме.
Адказам актывістка засталася незадаволеная. Яна лічыць, што чыноўнікі абараняюць «чужых нашай культуры герояў».
UPD 12 снежня. У фермерскай гаспадарцы «Фальварак каралеўскай дурніцы» ў вёсцы Чырвоны Бераг пры правядзенні навагодніх і калядных мерапрыемстваў будуць выкарыстаны толькі традыцыйныя казачныя навагоднія персанажы: Дзед Мароз, Снягурка. Снегавік, сняжынкі і інш. Так вырашыў Мінскі аблвыканкам пасля звароту Вольгі Бондаравай.
«Ніводзін „Фальварак каралеўскай дурніцы“ не выстаіць перад спакусай прапагандаваць традыцыйныя каштоўнасці беларускага народа замест піндаскага Санта-Клаўса, які, да таго ж, быў заўважаны ў педафільскіх схільнасцях. Яно нам трэба? Стары ў акулярах з эльфамі і аленем? Не думаю», — лічыць Вольга.
Шматгадзінныя чэргі, перфаратар і два акенца на рэгістрацыю. Дзяўчына схадзіла ў Гродзенскае агенцтва па дзяржаўнай…
Прадпрыемства "Гродна Азот" 12 лютага ў Telegram-канале анансавала конкурс да Дня роднай мовы. Да самога…
Палітзняволены з Гродна Кірыл Кетурка скончыў жыццё самагубствам у Цэнтры ўтрымання пад вартай у Варшаве-Служэўцы…
Былому сенатару і дырэктару «Краснасельскбудматэрыялы» Уладзіміру Кісялёву пагражае да трох гадоў калоніі за разгалашэнне службовай…
"Малочны Мір" абавязалі змяніць назву для серыі глазураваных сыркоў. Пасля чыёсьці скаргі ў Міністэрства антыманапольнага…
На Гагарына, 25 у Гродне прадаецца двухпакаёвая кватэра з выдатна захаваным постсавецкім інтэр'ерам. Дом, у…