Лозунг «Жыве Беларусь» прызналі нацысцкім. На колькі гадоў за яго будуць саджаць?

Міністэрства ўнутраных спраў унесла лозунг «Жыве Беларусь» ў спіс нацысцкай сімволікі і атрыбутыкі. Адпаведны дакумент апублікавалі на Нацыянальным прававым партале.

У дакуменце акрэслілі, што вітанне «Жыве Беларусь» і водгук «Жыве» ў суправаджэнні паднятай рукі з раскрытай далонню — сімвал 13-га Беларускага паліцэйскага батальёна пры СД [служба бяспекі рэйхсфюрэра — Hrodna.life] і 30-й грэнадзёрскай (пяхотнай) дывізіі Ваффэн-СС.

Ці лічацца нацысцкімі выгук «Жыве Беларусь» і адказ на яго без жэставага суправаджэння або адпаведны надпіс — невядома.

Што яшчэ ўнеслі ў спіс нацысцкага

Пастанова МУС датычыць двух спісаў: нацысцкіх арганізацый і структур ды нацысцкай сімволікі і атрыбутыкі. У абноўленых спісах дзевяць арганізацый і 52 віды сімволікі. Спіс нацысцкіх арганізацый папоўніла «30-я грэнадзёрская (пяхотная) дывізія Ваффэн-СС (руская № 2, яна ж беларуская № 1), на нямецкай мове — 30. Waffen-Grenadier-Division der SS (ruthenische Nr. 2) weissruthenische Nr. 1. У пастанове пазначана, што ў асноўным яна складалася з былых вайскоўцаў «Беларускай Краёвай Абароны».

Якое пакаранне будзе за публічнае дэманстраванне такой сімволікі

За прапаганду альбо публічнае дэманстраванне такой сімволікі, у тым ліку ў інтэрнэце, могуць пакараць крымінальнай адказнасцю паводле арт.341−1. Абвінавачанаму будзе пагражаць штраф, арышт, абмежаванне волі да трох гадоў або пазбаўленне волі да чатырох гадоў.