У Гродне з’явяцца звышхуткія зарадкі для электракараў: аўто зарадзіцца хутчэй, чым паспееш кавы папіць

Два суперхуткія зарадныя комплексы для электракараў адрыюць у Гродне ў 2023 годзе. Пра гэта паведаміў кіраўнік упраўлення перспектыўных энэргетычных тэхналогій цэнтральнага апарата кампаніі «Беларуснафта» Аляксей Нікіценка.

Папоўніць узровень зарада аўтамабіля, якога хопіць на 300 км, можна будзе за 10 хвілін.

На зарадным комплексе змогуць зараджацца адначасова электробус і восем аўтамабіляў. Моц зарада будзе дзяліцца аўтаматычна з прыярытэтам для электробуса.

«Асноўныя перавагі комплекса — зарадка электрабусаў адначасова з электрамабілямі на высокай хуткасці, сістэма назапашвання энэргіі, крама безаператарнага гандлю», — сказаў Нікіценка.

Дзе яшчэ ў Беларусі адкрыюць такія комплексы

Падобныя комплексы з’явяцца не толькі ў Гродне. Агулам у Беларусі адкрыюць дзевяць падобных станцый: яшчэ чатыры ў Мінску (адну з іх да канца 2022 года) і тры на трасе М1.

Да канца 2022 года ў Беларусі «Беларуснафта» плануе адкрыць каля 30 электразаправачных станцый. На 2023 год спраектавалі яшчэ 60 станцый хуткай зарадкі магутнасцю 50 кВт. Станам на лістапад 2022 года ў Беларусі больш за 600 электрычных заправачных станцый.

Да 2030 года Беларусь павінна скараціць выкіды парніковых газаў

Да 2030 года Беларусь абавязалася скараціць да 2030 года выкіды парніковых газаў не менш, чым на 28% ад узроўня 1990 года. Транспарт у складзе выкідаў парніковых газаў займае чацвёртае месца пасля энэргетыкі, прамысловасці, сельскай гаспадаркі.