«Еўраопт» прыпыніць працу «Е-дастаўкі» ў Гродзенскай вобласці з 1 лістапада 2022 года. Замовіць дастаўку можна будзе толькі ў Гродне, паведамілі на сайце гандлёвай сеткі.
Абноўлена 1.11.2022. Тэхнічныя магутнасці «Е-дастаўкі» на дадзены момант дазваляюць апрацаваць абмежаваную колькасць заказаў, патлумачыла пазней дырэктарка па маркетынгу ЗАТ «Інтэрнэт-крама Еўраопт» Алена Сітдзікава для Office Life. Прааналізаваўшы попыт на сэрвісы «Е-дастаўка» і «Емолл», кампанія вызначыла, што сэрвіс emall.by карыстаецца вялікім попытам па ўсёй Беларусі, і асабліва ў рэгіёнах. Кампанія вырашыла ў рэгіёнах сфакусавацца на апошнім, а ў Мінску і абласных гарадах — на «Е-дастаўцы».
Для «Емолл» мінімальная сума замовы для дастаўкі ў аддзяленні паштовай сувязі «Европочта» Мінска і абласных гарадоў — 25 рублёў, іншых населеных пунктаў — 30, удакладніла выданне. Сума пакупак для бясплатнай дастаўкі праз сэрвіс «Е-дастаўка» у залежнасці ад горада складае 70−150 рублёў.
Дастаўку пакінулі ў Мінску і Мінскай вобласці, а таксама ў абласных цэнтрах і Баранавічах.
«Змены ўводзяцца на нявызначаны тэрмін. Спадзяемся, што ў хуткім часе зноў зможам забяспечыць дастаўку па ўсёй Рэспубліцы Беларусь без абмежаванняў», — напісалі на сайце.
Цана за платную дастаўку складзе 4,99 рублёў. Пры замове на суму не менш за 150 рублёў дастаўка бясплатная. Замовы, якія пакупнікі аформілі да 7:00, змогуць даставіць да 15:00. Замовы на дзень дастаўкі прымаюць да 13:00.
Чытайце таксама: Супрацоўніца «Еўраопта» скрала 33 тысячы рублёў: хацела абагаціцца на крыптавалюце
