Алега Курыліна прызначылі дырэктарам завода «Хімвалакно». Адпаведны загад падпісаў дырэктар «Гродна Азот» Ігар Ляшэнка, паведаміла выданне «Гродзенскі хімік».
Папярэдняе месца працы Курыліна — Беларускі дзяржаўны канцэрн па нафце і хіміі («Белнафтахім»). Там ён займаў пасаду намесніка старшыні.
Што вядома пра новага дырэктара
Алег Курылін нарадзіўся ў Светлагорску ў 1972 годзе. Скончыў Саратаўскае вышэйшае вайсковае інжынернае вучылішча, Гомельскі кааператыўны інстытут, а таксама Акадэмію ўпраўлення пры Прэзідэнце Рэспублікі Беларусь.
Раней ён працаваў на Светлагорскім вытворчым аб’яднанні «Хімвалакно», у Белінвестбанку, на Гомельскім хімічным заводзе, а таксама на прадпрыемстве «Полацк-Шкловалакно».
Што з папярэднім дырэктарам
Папярэдні дырэктар Віталь Рудзінскас сышоў з пасады ў красавіку 2021 года. Да гэтага часу яго абавязкі выконваў галоўны інжынер. Віталь Рудзінскас адмовіўся пракаментаваць Hrodna.life абставіны свайго сыходу.
