У Беларусі вырастуць выплаты на дзяцей — але бацькі гэтага не заўважаць

Бацька з дзіцем чытаюць кнігу. Фота ілюстрацыйнае. Фота: Picsea, unsplash.com

У Беларусі з 1 жніўня падымуць штомесячныя выплаты па доглядзе дзяцей да трох гадоў. Рост складзе 3,1% у параўнанні з цяперашнімі выплатамі, піша БелТА. Інфляцыя ўжо «з'ела» гэты рост — яна склала 13,1% з пачатку года.

З 1 жніўня 2022 года да 31 студзеня 2023 года ў Беларусі будуць выплачваць:

на першае дзіця-556,05 руб. цяпер гэтая выплата-539,56 руб., павялічыцца на 16,49 руб.
на другога і наступных дзяцей-635,48 руб. цяпер-616,64 руб., рост на 18,84 руб.
на дзіця-інваліда-714,92 руб. цяпер-693,72, рост на 21,2 руб.

Выплаты вырастуць на 3,1% у параўнанні з ліпенем гэтага года і на 12,2% у параўнанні са жніўнем 2021. Таксама з 1 жніўня павінны зменіцца памер аднаразовай выплаты пры нараджэнні дзіцяці. Ён залежыць ад бюджэту пражытковага мінімуму.

Чытайце таксама: Стать в очередь в детский сад можно будет через интернет

Ад чаго залежыць рост дапамогі

Памер дапамогі на дзіця («дэкрэтныя» выплаты) пераглядаюць раз на паўгода. Да 2017 года яго пераглядалі раз на квартал. Як ён зменіцца залежыць ад таго, ці вырасла сярэдняя зарплата ў Беларусі, і на колькі. Дапамога на першае дзіця складае 35% сярэднямесячнай заработнай платы па краіне за квартал, на другое і наступных дзяцей — 40%, на дзіця-інваліда — 45%. У другім квартале 2022 года сярэдняя зарплата ў Беларусі склала 1 588,7 руб.

Дапамогу на дзіця ва ўзросце да трох гадоў выплачваюць на 238,6 тыс. дзяцей. У гэтым годзе на яе пойдзе 1,7 млрд руб., 100 млн з гэтай сумы выплацяць у сувязі з павышэннем з 1 жніўня.

Рост ўжо з’ела інфляцыя

У лютым 2022 года цэны на тавары і платныя паслугі ў Беларусі выраслі на 1,6% да папярэдняга месяца, у сакавіку — на 6,1% да лютага, у красавіку — на 1,6% да сакавіка, у траўні — на 0,7% да красавіка, а ў чэрвені — на 1,1% да траўня. З пачатку года інфляцыя склала 13,1%.

Гадавая інфляцыя — рост коштаў параўнальна з адпаведным месяцам год таму — у красавіку 2022 склала 16,8%, у траўні - ужо 17%, у чэрвені-17,6%. Нацыянальны банк плануе ў 2022 годзе знізіць выніковую гадавую інфляцыю да 6%. МВФ прагназуе рост коштаў на ўзроўні 7,1%, Еўразійскі банк развіцця чакае рост 7,4%, піша Myfin. Пры гэтым сярэднетэрміновая мэта Нацбанка — рост коштаў на 5% у год. У 2021 годзе інфляцыя была 9,97%.

Чытайце таксама: