Бар «Corsar» на вуліцы Кірава, 3 закрыўся. Прычына — пазыка перад арэндадаўцам. Пра гэта Telegram-каналу Радыё «Harodnia» распавёў апошні ўладальнік бара Андрэй Мароз. Таксама ён паведаміў, што зараз каманда бара ў пошуку новага памяшкання і фінансаў.
«Установа закрылася нечакана. І нас па сутнасці выгналі, а пазыкі засталіся: як перад камунальнымі службамі і арэндадаўцам, так і перад пастаўнікамі і іншымі людзьмі. Мне трэба працаваць, каб іх закрыць. Я не магу прасіць аб большым каманду, з якой мы рабілі бар лепш, але яны сапраўды ўсе шыкоўныя хлопцы. І я быў бы рады, калі яны павераць у мяне яшчэ раз і мы ўсе разам папрацуем яшчэ раз. Але ўжо не з мінусу падымаючы бар, а з нуля. Робячы першапачаткова нешта сваё і ўнікальнае. Так што будзем рабіць новы бар, пытанне толькі ў часе».
Бар «Corsar» адкрылі ў сакавіку 2018 года. За чатыры гады ў бары змяніліся тры ўладальнікі. У жніўні 2021 года бар выставілі на продаж у сувязі са зменай месца жыхарства папярэдняга ўладальніка, тады бар выкупіў Андрэй Мароз.
«З набыццём бара была звязаная цікавая гісторыя. У той час я арганізоўваў канцэрт сумесна з сябрамі, вакалістамі з „Міленіума“ [вакальная студыя на базе палаца культуры — Радыё „Harodnia“], і шукаў пляцоўку як для мерапрыемства, так і для дадатковых рэпетыцый. Ну і па знаёмстве зайшоў у „Corsar“ да былога ўладальніка з такім пытаннем. На што ён [папярэдні ўладальнік бара Мікалай — Радыё „Harodnia“] жартам прапанаваў набыць бар. Ідэя мяне зацікавіла, разгаварыліся, ударылі па руках і працэс пайшоў».
Па словах Андрэя, гэта гісторыя пра тое, як з нулём грошай у кішэні і з адсутнасцю фінансавай падушкі ўляцець з дзвюх ног у грамадскае харчаванне.
«Першы час працавалі ў старым фармаце, набіраючыся вопыту са старой камандай. За што ім бясконца ўдзячны, бо без іх усё гэта скончылася б значна раней. Бар я хацеў зрабіць канцэртнай пляцоўкай з досыць высокім узроўнем, але не мог сабе дазволіць проста зачыніцца, зрабіць што хачу і адкрыцца. Таму пачалі змяняць бар толькі з красавіка 2022 года», — распавёў Андрэй.
На думку Андрэя, пачатак 2022 года быў не вельмі ўдалым, бо «сусветная сітуацыя, святы на выходныя, зіма і гэтак далей». Паколькі ў гэты час паток людзей пачаў імкліва змяншацца, было прынята рашэнне пачаць.
Каманда бара пачала з касметычнага рамонту. Пасля зрабілі сцэну для выступаў і пачалі праводзіць канцэрты. У чэрвені пачалі павольна ўводзіць кухню.
«Грамадскае харчаванне проста так не зачыняецца ці прадаецца. У нас прыкладна са снежня пачаліся праблемы з аплатай арэнды, бо быў суд на буйную суму з пастаўніком, і ўжо пасля гэтага пазыка пачала расці. Аналізуючы бухгалтэрыю я магу лічыць, што мінулыя ўладальнікі ў часы кавіда сутыкнуліся з падобнымі праблемамі. Таксама былі затрымкі па аплаце арэнды, што падарвала давер да нашай арганізацыі. Як правіла, у такіх сітуацыях крайнім аказваецца апошні ўладальнік. Яму даводзіцца „аддувацца“ за ўсе грахі», — сказаў Андрэй.
З-за пазыкі арэндадаўца вырашыў скасаваць дамову арэнды. «Аб'ектыўна, сума пазыкі не такая вялікая [$ 4 тыс. — Радыё „Harodnia“], я сутыкаўся з сумай разы ў два больш, калі толькі набыў бар. У цэлым, калі б мы працягнулі, усё было б добра, але ў кожнага свой пункт гледжання на сітуацыю. І кагосці вінаваціць за рашэнні - глупства. Проста збег абставінаў і карысны вопыт», — лічыць Андрэй.
Андрэй лічыць, што дзякуючы атрыманаму вопыту ён у стане зрабіць штосці новае. У старое памяшканне ён вяртацца не хоча. Але калі атрымаецца знайсці новае, то гэта будзе не дыска-бар. «Хочацца зрабіць нейкае ўтульнае, лампавае месца, дзе можна пасядзець, пагаварыць, перакусіць і паслухаць музыку», — сказаў Андрэй.
Зараз Андрэй шукае памяшканне і фінансы для новага бара. «Мы не сумуем і верым, што гэта толькі пачатак чагосці большага. Таму, калі будзе адкрывацца новы бар, мы ўсё раскажам».
Шматгадзінныя чэргі, перфаратар і два акенца на рэгістрацыю. Дзяўчына схадзіла ў Гродзенскае агенцтва па дзяржаўнай…
Прадпрыемства "Гродна Азот" 12 лютага ў Telegram-канале анансавала конкурс да Дня роднай мовы. Да самога…
Палітзняволены з Гродна Кірыл Кетурка скончыў жыццё самагубствам у Цэнтры ўтрымання пад вартай у Варшаве-Служэўцы…
Былому сенатару і дырэктару «Краснасельскбудматэрыялы» Уладзіміру Кісялёву пагражае да трох гадоў калоніі за разгалашэнне службовай…
"Малочны Мір" абавязалі змяніць назву для серыі глазураваных сыркоў. Пасля чыёсьці скаргі ў Міністэрства антыманапольнага…
На Гагарына, 25 у Гродне прадаецца двухпакаёвая кватэра з выдатна захаваным постсавецкім інтэр'ерам. Дом, у…