Афіцыйнае адкрыццё новай установы грамадскага харчавання запланавалі на 18 чэрвеня. Але ў тэставым рэжыме рэстаран Larionoff працуе каля двух тыдняў, а да адкрыцця рыхтаваўся блізу года.
Установа пазіцыянуе сябе як месца для сямейнага адпачынку, хоць у пятніцу-суботу адкрыта да 2:00. У інтэр’еры захавалі цагляныя сцены, аркі і скляпенні, дадалі шмат штучнай зеляніны і вялікіх люстэркаў. Колерам забяспечылі занаванне.
Чым накормяць
У меню рэстарана – карбанара, капрэзэ, розныя віды стейкаў, пасты, спаржа, незвычайныя салаты з сырамі, супы. Як халодныя закускі прапануюць мясное і сырнае асарці, брускеты, тартар з тунца і ялавічыны, карпача. На гарачае праз папярэднюю замову могуць прыгатаваць рыбу дарада, запечаную ў саляным панцыры з гарнірам з цыбулі парэя. Страву падае шэф-кухар – з элементамі фламбавання (полымем) і разбіраннем на месцы.
Цэны на халодныя закускі вар’ююцца ад 14 рублёў за асарці гародніны (200 гр.) да 38 за севічэ з ласося з авакада (250 гр.), на супы – 9-15 рублёў, гарачае – ад 15 рублёў за вок з курыцай да 30-65 за стэйкі. Гарніры каштуюць ад 5 да 12 рублёў, салаты — 18-38. Ёсць традыцыйныя піўныя закускі ад 5 да 35 рублёў, асарці закусак – 36 рублёў за 450 гр. Асобна прапануюць дзіцячае меню – ад мецца пенэ з таматамі і шпінатам за 2 рублі да нагетсаў за 8. Дэсерты каштуюць 10-12 рублёў, салата з садавіны – 18 рублёў (275 гр.).
Месца – былая пяльменная
Установу адкрыў Віктар Ларыёнаў. Ён валодае сеткай кавярняў “Ш&Б”, размешчаных у гандлёвым цэнтры на Калючынскай, 21 і ў парку Жылібера на месцы былых “Калабкоў”.
З 1961 па 2000 год на Савецкай, 23 працавала папулярная закусачная “Пяльменная”. Там падавалі пяльмені пяці відаў, пры гэтым ежа абыходзілася нядорага. У 2010 годзе на месцы пяльменнай адкрылі бістро “Семафор”. У траўні 2021 года права арэнды памяшкання прадалі за 52 тыс. рублёў.
Дзе: Гродна, вул. Савецкая, 23.
Час працы: нядзеля-чацвер 11:00-23:00, пятніца-субота 11:00-02:00.
Чытайце таксама:
