Затрыманая ў Гродне Лізавета Мерляк дала падпіску аб неразгалошванні

Сябра Беларускай сацыял-дэмакратычнай партыі, міжнародны сакратар Беларускага Незалежнага прафсаюза Лізавета Мерляк дала падпіску аб неразгалошванні. Пра гэта стала вядома 22 красавіка. Падрабязнасці яе затрымання будуць невядомыя.

Лізавету Мерляк затрымалі ў Гродне ўвечары 21 красавіка. Пра затрыманне паведаміла партыя БСДП. У той жа вечар яе адпусцілі, паведамілі ў сетках яе блізкія.

Лізавету таксама затрымлівалі ў жніўні 2020 года — на вачах у яе дзіцяці. Пазней яе асудзілі на штраф 270 рублёў (у 2020-м годзе — 10 базавых велічынь) за ўдзел у несанкцыянаваных мерапрыемствах. Яна выступала супраць парушэння правоў працоўных і правоў чалавека ў Беларусі.

«Справа прафсаюзаў»

Па папярэдніх дадзеных на вечар 22 красавіка, у перыяд 19−21 красавіка былі затрыманыя 19 прадстаўнікоў незалежнага прафруху Беларусі. Гэта кіраўніцтва і супрацоўнікі офіса Беларускага кангрэса дэмакратычных прафсаюзаў (БКДП), а таксама лідары і актывісты, якія ўваходзяць у БКДП прафсаюзаў СПМ (Свабодны прафсаюз металістаў), СПБ (Свабодны прафсаюз Беларускі), РЭП (Беларускі прафсаюз работнікаў радыёэлектроннай прамысловасці), паведамляе «Салідарнасць».

Паводле звестак «Салідарнасці», затрыманыя і змешчаныя ў СІЗА: Аляксандр Ярашук, Сяргей Антусевіч, Ірына Буд-Гусаім, Мікалай Шарах, Генадзь Фядыніч, Яна Малаш, Віталь Чычмараў, Міхаіл Громаў, Васіль Бераснеў, Зміцер Бародка, Аляксандр Еўдакімчык, Міраслаў Сабчук. 80-гадовы лідар СПМ Аляксандр Бухвостаў — у шпіталі з сардэчным прыступам.