На Кляцкова за Triniti пабудуюць яшчэ адзін гандлёвы цэнтр. Якім ён будзе (і чаму там)?

У мікрараёне «Вішнявец-2», адразу за харомінай Triniti, вырашылі збудаваць гандлёвы цэнтр паменш. Грамадскія абмеркаванні пройдуць з 26 красавіка па 20 траўня 2022. Двухпавярховы будынак ламанай формы хочуць узвесці каля жылых дамоў № 25 і 35 па праспекце Кляцкова, піша Telegram-канал Urban Hrodna.

У плане другі паверх будзе часткова навісаць у паўночным і ўсходнім кірунку. Дах будынка плануецца плоскім, без гарышча. Габарытныя памеры новага гандлёвага цэнтра — 24×48 м. Плошча ўчастка пад будаўніцтва і абслугоўванне будынка — 0,27 га.

Каркас ГЦ хочуць ўзвесці са зборных жалезабетонных канструкцый, вонкавыя сцены — з трохслаёвых зборных сэндвіч-панэляў. Вентыляваны фасад абліцуюць пліткамі керамаграніту і металічнымі ламелямі.

На першым паверсе плануюць размясціць гандлёвую залу прадуктовай крамы з дапаможнымі памяшканнямі і два арэндныя памяшканні. На другім паверсе ў арэнду будуць здаваць гандлёвыя памяшканні з нехарчовымі таварамі. У блоку дапаможных памяшканняў будзе гардэробная персаналу, санітарныя памяшканні, працоўны кабінет, цеплавы пункт і электрашчытавая. У загрузна-складской зоне — загрузная і памяшканне смеццевых кантэйнераў.

Асноўны пад’езд прадугледжаны па існым ўнутрыквартальным праездзе з боку жылога дома № 25 па пр. Кляцкова. Перад галоўным уваходам у будынак з боку праспекта запраектавана гасцявая паркоўка на 31 месца (з іх адно — для людзей з інваліднасцю). Пад’езд да загрузнай пляцоўкі аб’екта будзе таксама з боку дома № 25.

Асноўныя ўваходы для наведвальнікаў размесцяць з боку паўночнага і ўсходняга фасадаў (Кляцкова і Triniti). На ўчастку прадугледжаны малыя архітэктурныя формы — сметніцы, лаўкі. Ходнікі, праезды і паркоўкі будуць з ходнікавай бетоннай пліткі, паміж імі уладкуюць газоны.

Чаму ГЦ менавіта там?

Участак пад пабудову гандлёвага цэнтра прадалі 9 лістапада 2021 года за 50 тысяч рублёў. Яго купіў гродзенскі бізнесмен. Ён быў адзіным пакупніком на аўкцыёне. На яго думку, людзі, якія будуць ісці ў гандлёвы цэнтр Triniti ці назад, абавязкова наведаюць і ягоны аб’ект.

Дзе глядзець праект і куды адпраўляць заўвагі

Паглядзець праект можна з 26 красавіка па 10 траўня (8:00—13:00, 14:00—17:00, па буднях) у вестыбюлі ўпраўлення будаўніцтва, архітэктуры і горадабудаўніцтва гродзенскага гарвыканкама (пл. Антонія Тызенгаўза, 3).

Заўвагі і прапановы па праекце можна дасылаць з 26 красавіка па 20 траўня. Іх прымае:

• Гродзенскі гарвыканкам (па пошце пл. Леніна, 2/1, 230 023, Гродна; на e-mail: gorisp@gorod.grodno.by або праз сэрвіс «Электронныя звароты» на сайце гарвыканкама);
• Упраўленне будаўніцтва, архітэктуры і горадабудаўніцтва гарвыканкама (пл. Антонія Тызенгаўза, 3, 230 023, Гродна; e-mail: arhitektura@gorod.grodno.by).

Прэзентацыя праекта пройдзе 4 траўня ў 15:00 у каб. 1 упраўлення будаўніцтва, архітэктуры і горадабудаўніцтва.