«Я прайграю, але будзе весела». Віцебская «хімія» судзіцца з Ігарам Банцэрам

Пасяджэнне па іску папраўчай установы адкрытага тыпу № 9 у Віцебску да Ігара Банцэра прайшло 11 красавіка ў судзе Ленінскага раёна Гродна. Яго судзяць за камунальныя паслугі, якія ён павінен быў заплаціць, калі знаходзіўся на «хіміі», паведамляе Telegram-канал «Право имеют».

Запазычанасць склала 81,66 рублёў і 64 рублі пошліны. Банцэр плаціць не хоча, бо з 130 дзён ён правёў 82 дні ў штрафным ізалятары.

Банцэру на пасяджэнні 11 красавіка не дазволілі азнаёміцца з 13 лістамі, якія знаходзяцца ў матэрыялах справы. Таму ён спаслаўся на Канстытуцыю і папрасіў адкласці справу, пакуль ён не знойдзе сабе адваката. Пасяджэнне перанеслі на 15.00 20 красавіка. Ён збіраецца знайсці абаронцу і азнаёміцца з матэрыяламі справы. Ігар мяркуе, што работнікі суда і пракуратуры баяцца паказаць яму дакументы.

Ігар збіраецца выклікаць сведак, якія пацвердзілі б, што начальнік папраўчай установы ставіцца да яго прадузята. «Я прайграю, але будзе весела. Будзем змагацца, хоць я і не веру ў добры сыход. Кожны чалавек, хто чытае статыстыку, „Судовы веснік“ беларускі, ведае, які ў нас вынік у судах. Менш за 0,01% спраў выграюць грамадзяне. Астатнія — самы справядлівы, савецкі, гуманны суд у свеце», — паабяцаў Банцэр.

Ігар Банцэр — гродзенскі рок-музыкант і перформер. Банцэра затрымалі ў кастрычніку 2020 года за перформанс 5 верасня, які прызналі хуліганствам. Суддзя Наталля Козел 19 сакавіка 2021 года прысудзіла яму 1,5 года абмежавання волі з накіраваннем у выпраўленчую ўстанову адкрытага тыпу. З 3 сакавіка, калі пачаўся разгляд справы ў судзе, Ігар трымаў «сухую» галадоўку (не прымаў ежы і вадкасці) 16 дзён. 15 сакавіка праваабаронцы прызналі Банцэра палітвязнем. У выніку галадовак у яго пагоршылася здароўе. Ігара Банцэра выпусцілі з папраўчай установы адкрытага тыпу № 9 у Віцебску 17 снежня 2021 года. Ён адбыў там увесь прызначаны тэрмін.

Чытайце таксама: Былога палітвязня Ігара Банцэра выклікалі ў Следчы камітэт