“Калі не забяспечана таямніца, то гэта не галасаванне”. Якія парушэнні былі ў Гродне ў першы дзень рэферэндуму

Датэрміновае галасаванне на канстытуцыйным рэферэндуме пачалося 22 лютага. У першы дзень яўка на Гродзеншчыне была самай нізкай з усіх абласцей – 4,14%. На выбарчых участках ужо адбываюцца парушэнні: на кабінках няма шторак, на ўчастка няма незалежных назіральнікаў, а студэнтаў і бюджэтнікаў заганяюць на датэрміновае галасаванне.

Як заганяюць на датэрміновае галасаванне

Супрацоўнікаў ААТ “Гродна Азот” гатовыя адпусціць з працы на дзве гадзіны раней, калі яны прагаласуюць датэрмінова. Тых, хто жыве ў інтэрнатах, просяць больш настойліва, паведаміў праваабарончы цэнтр “Вясна”. 

Таксама ў першы дзень датэрмінова галасавалі студэнты Гродзенскага дзяржаўнага палітэхнічнага каледжа. 

“Датэрміновае галасаванне гэта мажлівасць шматлікіх фальсіфікацый. Калі чалавек прыходзіць галасаваць датэрмінова, то ён можа прыйсці і на наступны дзень. Так званая “карусель”. Пры чым назіральнік не можа паглядзець, наколькі чалавек адпавядае спісу, бо забаронена падыходзіць да сталоў камісіі”, – распавёў Hrodna.life Сяргей Верамеенка, які каардынаваў назіранне ў Гродне на папярэдніх выбарах.

“Прымусовае галасаванне забаронена ў Беларусі. Яно добраахвотнае і кожны ідзе згодна свайму жаданню. Cтудэнты, вайскоўцы, людзі абмежаваныя воляй заўсёды былі самыя неабароненыя. Напрыклад, студэнтаў ганялі на датэрміновае галасаванне пад пагрозай высялення з інтэрнату. Тое ж самае вайскоўцы. Я памятаю сам, як нас у савецкім войску ганялі, – расказаў Сяргей Верамеенка. – Быў выпадак на адным з участкаў, што людзей, якія адбывалі “хімію”, проста вялі шэрагам, а сзаду ішоў чалавек у форме і нёс стос пашпартоў”.

За першы дзень ужо былі парушэнні

“Самае галоўнае парушэнне – недапушчэнне незалежных назіральнікаў. Асноўную масу не дапусцілі пад рознымі маркамі. Кагосці нават затрымлівалі. Хто прыходзіць і звяртае ўвагу, таго адразу затрымліваюць і праводзяць размову. Гэта тое, што адпрацоўвалі раней, і тое, што будуць выкарыстоўваць. Ціск будзе павялічвацца і ў нядзелю будзе апагей”, – лічыць Сяргей Верамеенка.

На шматлікіх участках для галасавання ў Гродзенскай вобласці адсутнічаюць фіранкі. Гэта адно з асноўных парушэнняў прынцыпа таемнасці галасавання. Яно дазваляе камісіі і іншым выбаршчыкам, якія стаяць у чарзе, паглядзець, як галасуе чалавек.

“Галасаванне павінна быць таемным. Адсутнасць фіранак на кабінках мы фіксавалі яшчэ ў 2020-м годзе. Тады казалі, што каранавірус і гэта такі клопат пра здароўе. Дык тады ўвогуле навошта праводзіць галасаванні. Бо гэта парушае закон аб выбарах. Калі не забяспечана таямніца галасавання – гэта не галасаванне”, – сказаў Сяргей Верамеенка.

У Гродзенскай вобласці яўка 4,14%, а якая ў іншых

У Гродзенскай вобласці самая малая яўка выбарнікаў на участкі – 4,14%. Яўка ў іншых абласцях:

Гомельская – 8,75%;

Мінская – 6,38%;

Віцебская – 6,37%;

Брэсцкая – 6,26%;

Мінск – 5,58%;

Магілёўская – 5,08%.

Агулам па краіне яўка выбаршчыкаў склала – 6,19%, паведаміў ЦВК.

Хто з гродзенскіх чыноўнікаў прагаласаваў у першы дзень

У першы дзень датэрміновага галасавання прагаласаваў першы намеснік старшыні аблвыканкама Юрый Валеваты, намеснікі старшыні аблвыканкама Віктар Пранюк і Віталій Нявера. Таксама прагаласаваў выконваючы абавязкі галоўнага трэнера ХК “Нёман” Андрэй Коршунаў і намесніца старшыні Гродзенскай абласной арганізацыі “Белая Русь” Святлана Варяніца.

На рэферэндум вынесена толькі адно пытанне: ці прыемаеце вы змены і дапаўненні Канстытуцыі Рэспублікі Беларусь? Варыянты адказу: “за” і “супраць”. Дзяржаўны сродкі масавай інфармацыі і дзяржаўныя ўстановы праводзяць актыўную агітацыю за тое, каб галасавалі “за” і датэрмінова.