Валанцёры з Гродна, Ліды і Мінска забралі на часовую ператрымку лабрадораў, мальтыйскіх балонак, чыхуахуа, ёркаў, чубатых, французскіх бульдогаў - усяго 114 жывёл са стыхійнага гадавальніка ў Карэлічах. З іх 32 патрапілі ў Гродна. Яшчэ 70 застаюцца ў заводчыцы. Сабакі, якіх выратавалі валанцёры, зарэгістраваныя ў Расіі і Украіне. На дзяўчыну, якая расказала пра жаласны стан гадавальніка, уладальніца сабак напісала заяву.

Што адбываецца з жывёламі зараз?

Сярод сабак, якіх забралі у Гродзенскае грамадскае аб’яднанне абароны жывёл «Преданное сердце», шмат сляпых і старых, знясіленых, распавяла Hrodna.life дырэктарка Гродзенскага кіналагічнага абласнога цэнтра «САТУРН» Анжаліка Сіднева. Заводчыкі і жыхары Гродна ўжо тэлефануюць у арганізацыю, каб забраць жывёл сабе, але, як адзначае Анжаліка, сабак немагчыма перадаць на пастаяннай аснове. Яны з’яўляюцца «рэчавымі доказамі» і ўласнасцю заводчыцы. Валанцёры пакуль не ведаюць як паступаць, бо баяцца, што заводчыца з Карэлічаў можа падаць у суд аб вяртанні жывёл, кажа Сіднева.

Зараз праходзіць пачатковы этап разбору, валанцёры і прадстаўніца Кіналагічнага таварыства правяраюць чыпы і клеймы сабак. У асноўным жывёлы зарэгістраваныя ва Украіне ці Расіі.

Пра заводчыцу стыхійнага гадавальніка з Карэлічаў ніхто не ведаў, бо яна не ўдзельнічала ў спецыяльных конкурсах для сабак, у клубах для заводчыкаў не складалася, распавяла Анжаліка Сіднева. Іншыя заводчыкі з вобласці ведаюць адзін аднаго і шакаваныя тым, што адбылося.

Як стала вядома пра сабаках з стыхійнага гадавальніка?

Наваградчанка Аліна распаўсюдзіла ў інтэрнэце відэа з гадавальніка ў Карэлічах у канцы студзеня. Пра гадавальнік яна даведалася, знайшоўшы аб’яву на сайце «Куфар» аб продажы ёрка амаль у 10 разоў танней за звычайную цану — 50 рублёў супраць 450.

Некаторыя сабакі ў гадавальніку спалі на снезе, не было місак для вады і ежы. Дзяўчына змагла забраць з гадавальніка трох самых запушчаных сабак — з пролежнямі, траўмаваным вокам і знясіленнем. Сабака, якога Аліна купіла, у тры гады важыў усяго 900 грам. Гэта ў два разы менш за нармальную вагу.

Дзяўчына планавала падаць у міліцыю заяву на жорсткае абыходжанне з жывёламі. Аднак прадстаўнікі крымінальнага вышуку самі прыйшлі да яе дадому і паведамілі, што на яе і яе знаёмых ужо пададзеная заява. Яны нібыта праніклі на чужую тэрыторыю, скралі 29 сабак і 9 мяшкоў корму. Заводчыца ацаніла шкоду на 30 тысяч еўра. Зараз ідзе разбіральніцтва.

5 лютага па заяве суседзяў і валанцёраў міліцыя апісала сабак са стыхійнага гадавальніка. Жывёл разабралі валанцёры з Гродна, Мінска, Ліды. Частку жывёл забралі на ператрымку валанцёры з гродзенскага «Преданного сердца».

Усе 32 сабакі, якія трапілі ў Гродна, агледжаныя ветэрынарамі: жывёлы знаходзяцца ў жаласным стане, многім патрабуецца сур’ёзная ветдапамога, у тым ліку хірургічная, асабліва па стаматалогіі, паведамляюць сацсеткі таварыства «Преданное сердце». Валанцёры з Ліды не змаглі пракаментаваць сітуацыю, бо ідзе разбіральніцтва.

Як дапамагчы?

На сённяшні дзень «Преданному сердцу» патрабуецца дапамога з аплатай ветэрынарных паслуг. 32 сабакі знаходзяцца на адказным захоўванні ў арганізацыі.

Дапамагчы фінансава можна праз АРІП: дабрачыннасць — абарона жывёл — Преданное сердце (код 241 285). У полі прозвішча, імя валанцёры просяць пазначыць нумар збору — «422» ці проста напісаць «Карэлічы».