Фота ілюстрацыйнае з архіву Hrodna.life
Будаваць мікрараён на месцы закінутага ваеннага гарадка № 15 на Фолюшы вырашылі пачаць гэтай вясной. Дэталёвы праект забудовы прэзентавалі 26 студзеня ў Гродзенскім гарвыканкаме. Новабудоўлі з’явяцца ў раёне вуліц Соламавай, Фолюш, Хвойнай і ракі Ласасянкі. Забудоўшчык плануе максімальна захаваць дрэвы і зменіць канфігурацыю некаторых дамоў з улікам апытання жыхароў новых дамоў на Лідскай.
Тэрыторыя забудовы будзе паміж шматкватэрнай жылой забудовай на поўначы і ўсходзе, камунальнай забудовай уздоўж вуліцы Суворава, рэчкай Ласасянкай і дзейнай вайсковай часткай, ад парку на месцы былых агародаў «Шанхая» да АЗС «Беларуснафта» на Соламавай і помніка ваеннапалонным «Шталага».
Будаўніцтва мікрараёна плануюць пачаць у красавіку-траўні 2022 года, піша «Вечерний Гродно». Пад забудову пойдзе 84,7 гектараў. Раней будаўніцтва збіраліся пачаць у канцы 2021 года.
Усяго пабудуюць 17 жылых дамоў агульнай плошчай 138,3 тысяч кв. метраў. У іх будзе 1002 трохпакаёвых, 845 двухпакаёвых і 145 аднапакаёвых кватэр. Мяркуюць, што пасля здачы ў эксплуатацыю раёна там будзе жыць 5,2 тысяч чалавек.
Самы нізкі будынак будзе ў тры паверхі. Самыя высокія — два будынкі па 16 паверхаў. Яны размесцяцца ў цэнтры забудовы. У іх адкрыюць дзіцячую і дарослую амбулаторыі.
Каля зоны адпачынку ля Ласасянкі ўзвядуць тры дамы-«змейкі». Яны будуць вышынёй у 5−7 паверхаў і з больш сечанымі выгінамі, чым у «змейках» на Лідскай. Да такога рашэння прывяло апытанне жыхароў такіх дамоў на Лідскай.
Дзіцячы садок і пачатковая школа будуць сумешчанымі. Аб’ект разлічваюць на 500 дзяцей. Ён з’явіцца каля ўжо заселеных трох дамоў-«свечак» у канцы вуліцы Фолюш перад школай № 37. Асобна новай школы вырашылі не будаваць — па падліках, павінна хапіць існуючай.
Пры праектаванні вырашылі максімальна захаваць тыя зялёныя насаджэнні, якія ёсць, патлумачыў забудоўшчык «Гроднажылбуд». Праз гэта адмовіліся ад зносу некаторых былых казармаў, каб цяжкай тэхнікай не пашкодзіць дрэвы.
Чытайце таксама:
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Некалькі сотняў Дзядоў Марозаў, Снягурак, сабачак, вавёрачак і разнастайных іншых персанажаў 20 снежня прайшлі ад…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…