Гродзенскі праект BANTgo – служба дастаўкі электрамабілямі – рэлацыраваўся у Эстонію і прыцягнуў першыя інвестыцыі. Да гэтага ўдзельнікі стартапа некалькі гадоў спрабавалі прасоўваць свае ідэі ў Беларусі.
Стартап BANTgo прывёз у Гродна першыя міні-электрамабілі. Айцішнікі хацелі развіваць у горадзе сэрвіс экалагічнай дастаўкі для кафэ і рэстаранаў, прапаноўвалі супрацоўніцтва гарадскім камунальным службам.
У канцы жніўня 2021 года гродзенскі праект змяніў “прапіску” – яго зарэгістравалі ў Эстоніі. У верасні хлопцам удалося прыцягнуць першыя інвестыцыі – 50 тысяч даляраў з 450 тысяч, на якія разлічаны pre-seed раўнд [ранні этап інвестыцый. – Hrodna.life]. Цалкам праект ацэньваецца ў 4,5 мільёна даляраў.
“Пасля першага чэка да нас усталі ў чаргу, зараз афармляем наступныя 50 тысяч”, – распавёў Hrodna.life заснавальнік стартапа Сяргей Жыльцоў.
Зараз для праекта купляюць 10 польскіх электрамабіляў. У Таліне з BANTgo ужо гатовыя супрацоўнічаць тры вегетарыянскіх рэстарана. У бліжэйшы час гродзенцы плануюць адкрыць свой цэнтр у Эстоніі, а ў наступным годзе – маштабаваць бізнэс.
У Гродне стартап згарнулі з-за таго, што не знайшлося жадаючых інвеставаць у праект з Беларусі, растлумачыў Сяргей Жыльцоў. Вытворца міні-электрамабіляў Sidus (менавіта іх тэставалі ў нашым горадзе) цяпер пераарыентаваўся на расійскі рынак.
У Гродне застанецца бэк-офіс праекта, дзе будуць тэставаць распрацоўкі. Ёсць планы прывезці з Еўропы два электракара, каб абслугоўваць індыйскі рэстаран “Ганга” і піцэрыю GoGoPizza.
Праект гродзенцаў прадставяць у ААН
Еўрапейскіх інвестараў прыцягвае ў BANTgo экалагічная і сацыяльная накіраванасць, адзначае Сяргей Жыльцоў. У параўнанні з падобнымі сусветнымі сэрвісамі гродзенцы прапанавалі адразу некалькі новых ідэй.
Хлопцы прыдумалі бізнес-мадэль, якая дапаможа кліентам прасоўваць уласны брэнд і аддаваць менш грошай на рэкламу. IT-дадатак дазволіць збіраць дадзеныя пра энергію, якой запраўляюцца машыны. У будучыні гэтая інфармацыя дапаможа праектаваць разумныя горада, а спажывец зможа выбіраць запраўкі з зялёнай энергіяй. Дзякуючы гэтай распрацоўцы праект стаў фіналістам Лічбавага акселератара ўстойлівага развіцця ЕАЭС.
Лічбавы акселератар ўстойлівага развіцця ЕАЭС – праграма падтрымкі інавацый, якія адпавядаюць мэтам ўстойлівага развіцця ААН. У конкурсе ўдзельнічала больш за 80 праектаў, стартап з Гродна стаў адным з 11 фіналістаў. Ён увайшоў у каталог “100 лепшых тэхналогій ўстойлівага развіцця ЕАЭС”, які будзе прадстаўлены на 26-й канферэнцыі ААН па змяненні клімату (пройдзе ў лістападзе 2021 года ў Глазга).
Гарадскія ўлады не зацікавіліся
Праект BANTgo гродзенцы развівалі ў Беларусі з 2020 года. Ідэяй цікавіліся гродзенскія і мінскія кавярні і рэстараны. У Брэсце старшыня гарвыканкама разглядаў варыянт выкарыстоўваць міні-электракары для патрэб ЖКГ. Гарадзенскія ўлады вялікай цікавасці не праявілі.
Да гэтага стартап як рэзідэнт тэхнапарку ГрДУ распрацоўваў праект па перапрацоўцы старых машын гарадскіх камунальных службаў у электрамабілі. Планавалі зрабіць маршрутныя электратаксі для тралейбуснага ўпраўлення, пераабсталяваць машыны для Гроднаэнерга. Але пасьля жніўня 2020 года ўзніклі цяжкасці з фінансаваннем.
