Ліквідацыя “Гродна Лайф Медыя” і “Цэнтра “Трэці Сектар” адбудзецца ў Гродне. Некалькі “палітычных” прысудаў вынеслі ў рэгіёнах. У сувязі з ужо распачатымі справамі затрымалі людзей – наперадзе новыя судовыя паседжанні. Рэдакцыя Hrodna.life вывучыла, што адбылося ў Гродне і вобласці з 23 па 29 жніўня.
Польшча будуе плот на мяжы з Беларуссю
Улады Польшчы вырашылі пабудаваць на мяжы з Беларуссю плот вышынёй 2,5 метра. Таксама ў дапамогу памежнікам прыцягнуць вайскоўцаў. Пра гэта напісаў міністр абароны Польшчы, Марыўш Блашчак ў сваім Twitter. Раней плот на мяжы з Беларуссю пачалі будавать Літва і Латвія.
Ліквідацыя трох арганізацый
Гродзенскую грамадскую арганізацыю «Цэнтр „Трэці сектар“» будуць ліквідаваць. Да 30 лістапада заснавальнікаў абавяжуць ліквідаваць арганізацыю ТАА “Гродна Лайф медыя”. А Вярхоўны суд Беларусі 27 жніўня ліквідаваў ГА «Беларуская асацыяцыя журналістаў».
Затрыманне дырэктара «Іквадарт»
Каля 12.00 25 жніўня ў офіс фірмы «Іквадарт» прыйшлі сілавікі ў экіпіроўцы. Дырэктар студыі Глеб Койпіш затрыманы. Кім і па якой справе — пакуль невядома.
Міліцыя на сходзе настаўнікаў польскай мовы
Супрацоўнікі міліцыі прыйшлі ў офіс Саюза палякаў у Беларусі раніцай 28 жніўня. Там адбываўся сход настаўнікаў з пляцовак вывучэння польскай мовы, што дзейнічаюць пры Саюзе. Міліцыянты запісалі асабістыя дадзеныя прысутных.
Прысуд студэнту пакінулі ў сіле
У Гродзенскім абласным судзе адбыўся разгляд апеляцыі на прысуд палітвязню Андрэю Герасімовічу, паведамляе Б*лсат. Раней 21-гадоваму хлопцу прысудзілі 2,5 гады калоніі агульнага рэжыму. Прысуд пакінулі ў сіле.
Затрыманне жонкі былога міліцыянта
У Лідзе 23 жніўня затрымалі Вольгу Махнач – жонку былога падпалкоўніка міліцыі, які сышоў са службы пасля выбараў. Яе адпусцілі пасля ператрусу, паведамляе Telegram-канал “Задержания, суды в Лиде”.
Юрый Махнач – былы падпалкоўнік міліцыі з Ліды, камандзір роты ППС Лідскага РАУС. Пасля выбараў ён запісаў свой зварот да сілавікоў, дзе распавёў, як рыхтавалі праваахоўнікаў да выбараў, хто аддаваў загады аб жорсткіх разгонах, а таксама аб збіцці людзей у Лідзе. 19 жніўня 2020 года ён напісаў рапарт аб звальненні. Юрый з’ехаў з краіны яшчэ дзевяць месяцаў таму, баючыся затрымання.
Затрыманне ў Слоніме
У Слоніме затрымалі мужчыну, які зняважыў каментаром ў “Аднакласніках” супрацоўніка Ленінскага РАУС г. Гродна.
Мужчыну прызналі падазраваным па арт. 369 КК “Абраза прадстаўніка ўлады”. У 2020-м грамадзянін яго ўжо судзілі за непадпарадкаванне законным патрабаванням супрацоўнікаў міліцыі.
Затрыманне за падзеі жніўня 2020 года
Жыхара Слонімскага раёна затрымалі за ўдзел у “жнівеньскіх беспарадках”. 26-гадовага непрацуючага вяскоўца прызналі падазраваным па раней узбуджанай крымінальнай справе.
Паводле версіі ГУБАЗ, у жніўні мінулага года разам з іншымі пратэстоўцамі ён аказваў супраціў супрацоўнікам міліцыі, блакаваў рух, а таксама выкрыкваў пратэстныя лозунгі ў Мінску. Гэтым ён “прымаў актыўны ўдзел у групавых дзеяннях, якія груба парушаюць грамадскі парадак”.
Тры гады калоніі за 13 каментароў
Аляксандра Нагелу ў Смаргоні асудзілі да трох гадоў калоніі агульнага рэжыму. Суддзя – Віктар Сянько, паведамляе “Гарадзенская вясна”.
Яго судзілі паводле ч. 1 арт. 130 КК за нібыта распальванне сацыяльнай варожасці ў дачыненні да супрацоўнікаў праваахоўных органаў за 13 каментароў у Telegram-канале.
Паўтара года калоніі – за дэманстрацыю роліка
Андрэя Пятроўскага засудзілі да аднаго з паловай гадоў калоніі ва ўмовах агульнага рэжыму. Суддзя – Людміла Міхневіч. 46-гадовы Андрэй – былы настаўнік гімназіі ў Смаргоні.
Паводле версіі абвінавачвання, Андрэй у сакавіку паказаў на ўроку відэаролік “Канстытуцыя сышла ў прастытуцыю!” з лагатыпам, які прызнаны ў Беларусі эктрэмісцкім. Сам ролік “змяшчае заведама ілжывую інфармацыю, які ганіць прэзідэнта”. Справу распачалі пасля таго, як вучань паведаміў пра гэта бацькам-чыноўнікам. Настаўнік не прызнаў віну.
2,5 года “хіміі” – за каментар
Апеляцыйную скаргу 19-гадовай студэнткі першага курса геаграфічнага факультэта БДУ з Ліды Дар’і Чайко Гродзенскі абласны суд не задаволіў.
Раней яе асудзілі па ч. 1 арт. 342 КК і арт. 369 КК на 2,5 года “хіміі” ў Лідскім раённым судзе. Суддзя – Максім Філатаў. Прычына – каментар, які абразіў супрацоўніка Следчага камітэта. Чайка прынесла яму прабачэнні і выплаціла 500 рублёў маральнай кампенсацыі.
Да 15 гадоў калоніі – за паведамленне
Інжынера Андрэя Крылова ў Ваўкавыску судзяць за паведамленне ў Telegram-чаце «Банда Луки», у якім ён нібыта заклікае да масавых беспарадкаў.
Мужчына пад вартай, яму пагражае пакаранне ад пяці да пятнаццаці гадоў пазбаўлення волі. На судзе Крылоў віну не прызнаў.
Новыя палітвязні ў вобласці
Двух жыхароў Гродзенскай вобласці прызналі палітвязнямі. Гэта Аляксандр Нагела і Леанід Герасімлюк.
Коратка:
- «Ніхто не спяшаўся». У Гродзенскім аблвыканкаме пракаментавалі чэргі ў ДАІ і абвінавацілі ў іх гродзенцаў.
- Год з Каранікам. Чым запомніўся старшыня аблвыканкама, прызначаны на мітынгу.
- Гродзенскія інтэлектуалы запусцілі цыкл лекцый, прысвечаных 30-ці годдзя аднаўлення незалежнасці Беларусі.
- У Гродзенскім аблвыканкаме закупляюць 300 значкоў з гербам вобласці. Колькі яны каштуюць?
- Тытунёвая фабрыка «Нёман» спадзяецца знайсці замену сыравіне з ЕС у Кітаі.
- Палітвязню і журналісту Анджэю Пачобуту падоўжылі тэрмін утрымання пад вартай на тры месяцы.
- Палітвязню і музыку Ігару Банцэру на хіміі на 10 сутак працягнулі ШЫЗА. Ён прабудзе там 30 сутак.
- Біскуп Антоні пабываў у гродзенскай турме і пагутарыў з людзьмі, якія адбываюць пакаранне.
- Расійскія ракетныя войскі прыбылі ў Гродна.
- Лісты ад палітвязня журналіста Дзяніса Івашына па-ранейшаму ідуць “дазавана”.
Чытайце таксама:
- Задержание бывшего милиционера, выход политзаключенного и дети с дубинками в костеле. Как прошла неделя в Гродно и области
- Новые политзаключенные, суд над учителем, ликвидация детского хосписа. Как прошла неделя в Гродно и области
- Три приговора, ликвидация ООО «Гродно Лайф Медиа» и повторный штраф журналистке. Как прошла неделя в Гродно и области
