Вадзіма Ермашука (блогера Vadimati) 19 жніўня асудзілі на 25 сутак адміністрацыйнага арышту ў Шчучынскім раённым судзе. Яго судзіў суддзя Дзмітрый Ціунчык паводле арт. 24.23 КаАП за нібыта заклікі прыехаць на спартовае масавае мерапрыемства — на скейт-пляцоўку ў Шчучыне. Тры дні блогер адмаўляўся ад ежы, са слоў адваката. Блізкія спадзяюцца пераканаць яго пачаць есці. Адбываць суткі ён будзе ў мясцовым ізалятары.

Яго затрымалі 16 жніўня, на наступны дзень дома правялі агляд, а 18 жніўня пачалі судзіць. Тады з Гродна яго прыехалі падтрымаць некалькі дзясяткаў чалавек. У будынак РАУС, дзе ў выязным пасяджэнні судзілі Вадзіма, нікога не пусцілі. Над гродзенцамі кружыў дрон, а з аўтамабіля без нумароў гулялі ваенныя песні. Каля банка ў той дзень дзяжурыла яго супрацоўніца — з-за вялікай колькасці людзей. Каля суда пастаянна знаходзіліся міліцыянты і людзі ў цывільным, падобныя да сілавікоў, перыядычна заходзілі вайскоўцы.

19 жніўня калонка з песнямі знаходзілася ўжо каля будынка РАУС. Гучная музыка замінала перагаворвацца з яго супрацоўнікамі. Некаторыя палічылі гэта парушэннем грамадскага парадку. Супрацоўнік РАУС сказаў, што гэта не мае дачынення да цяперашняга адміністрацыйнага працэсу. А ў судзе сказалі, што такое бывае — музыку ўключаюць для «ўзняцця баявога духу». У акне будынка РАУС гродзенцы пабачылі камеру — верагодна, іх зноў здымалі.

У суд пусцілі толькі блізкіх Вадзіма — сястру і цётку.

Чытайце таксама: В Щучине судят гродненского блогера Вадимати

Сястру блогера Вадзімаці Наталлю кудысьці павезлі ў міліцэйскім мікрааўтобусе. Яе вывелі з РУУС, дзе яна засталася, каб перадаць брату перадачу. Меркавана яе павезлі на апытанне. Тэлефон дзяўчына не здымае, але рэгулярна з’яўляецца ў сетцы. Гэта можа азначаць, што яе тэлефонам завалодалі сілавікі. Адвакат Наталлі была не ў курсе таго, што адбываецца.

Чытайце таксама: У сестры блогера Вадимати прошел обыск. Дело не связано с блогером

Хто такі Vadimati

Вадзім Ермашук — Instagram-блогер і прадавец на рынку «Карона». Актыўна займаецца рэкламай мясцовага бізнесу. 27 кастрычніка 2020 года яго асудзілі на штраф у 20 базавых велічынь (тады — 540 рублёў) у судзе Кастрычніцкага раёна за марш гродзенцаў 30 жніўня. Вадзім выказваўся супраць гвалту, падтрымліваў палітвязняў і наведваў суды па «палітычных» працэсах. Называе сябе «народным дэпутатам» і здымае ў гэтым вобразе відэа.