Ноччу з 2 на 3 жніўня літоўскія памежнікі развярнулі некалькі груп мігрантаў, якія спрабавалі незаконна перасекчы мяжу. Такім чынам Літва пачала рэалізоўваць прынятае напярэдадні рашэнне аб прымяненні ўсіх магчымых прадугледжаных законам сродкаў, каб не дапускаць парушэння дзяржаўнай мяжы.
Памежнікам дапамагала ваенная паліцыя і кінолагі з сабакамі, піша Delfi са спасылкай на прадстаўніка сілаў аховы дзяржаўнай мяжы Рокаса Пукінскаса.
Прасіць прытулку мігрантам цяпер прапаноўваюць толькі законнымі спосабамі - на кантрольна-прапускных пунктах і ў дыпламатычных прадстаўніцтвах.
«У нас цяпер усё ж ўведзена надзвычайная сітуацыя, яна пагаршаецца, — сказаў віцэ-міністр унутраных спраў Арнольдас Абрамавічус. — Таму памежнікі усімі законнымі спосабамі могуць развярнуць мігрантаў і паказаць ім, у які бок ім ісці». Паводле яго слоў, у першую чаргу гэта псіхалагічныя меры і загады. Прымяненне сілы будзе залежыць ад абставін і таго, як настроены мігранты.
Абрамавічус іранізаваў, што парушальнікам мяжы могуць казаць, што яны прыехалі ў Беларусь, любаваліся прыродай, заблукалі, але цяпер могуць працягнуць свой тур па краіне.
Надзвычайнае становішча ў Літве могуць увесці праз тое, што мігрантаў больш няма дзе размяшчаць, адзначыў віцэ-міністр. Яно можа быць уведзена на адрэзку працягласцю 5 км ці ў муніцыпалітэтах, дзе парушальнікі пераходзяць мяжу.
Па словах Абрамавічуса, ужо ёсць спіс іракцаў, якія думаюць пра вяртанне дадому. Тэхнічна гэта складаная працэдура. На прымусовае вяртанне не згаджаецца Ірак.
Агенцтва Еўрапейскага саюза па бяспецы знешніх межаў Frontex дапамагае Літве патруляваць мяжу. 1 жніўня пры патруляванні на верталёце ў Шальчынінкскім раёне супрацоўнікі Frontex зафіксавалі групу парушальнікаў мяжы, за якой ехаў аўтамабіль. Транспартныя сродкі такога тыпу выкарыстоўваюць беларускія памежнікі, піша Delfi са спасылкай на прэс-рэліз МУС.
2 жніўня ўсе літоўскія ведамствы, адказныя за ахову дзяржаўнай мяжы, абавязалі прымаць усе неабходныя і прадугледжаныя законам меры, каб парушальнікі не змаглі перасякаць мяжу ў забароненых месцах. Такое рашэнне прыняла кіраўніца МУС Літвы, кіраўніца аперацый дзяржаўнай надзвычайнай сітуацыі Агне Білатайтэ, паведамляе Delfi. Памежнай службе Літвы дазволілі разварочваць парушальнікаў мяжы і вяртаць іх у Беларусь.
Людзей, якія наўмысна незаконна перасякаюць мяжу ў забароненых месцах, павінны расцэньваць як злачынцаў, адзначыла Білатайтэ.
«Міграцыя можа быць толькі легальнай. Нелегальная міграцыя як частка гібрыднай атакі толькі кампраметуе інстытут абгрунтаванага палітычнага прытулку», — адзначыў у Facebook старшыня парламенцкага Камітэта па нацбяспецы і абароне Лаўрынас Кашчунас.
З пачатку 2021 года мяжу Беларусі і Літвы незаконна перасеклі больш за 4000 чалавек. Літва размяшчае іх у абсталяваных лагерах для ўцекачоў недалёка ад мяжы. Там пачалі ўспыхваць канфлікты з боку мігрантаў, таксама незадаволеныя мясцовыя жыхары. Літва ўзмацніла кантроль на мяжы з Беларуссю і пачала ўсталёўваць там бар’ер з калючага дроту.
Чытайце таксама:
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Некалькі сотняў Дзядоў Марозаў, Снягурак, сабачак, вавёрачак і разнастайных іншых персанажаў 20 снежня прайшлі ад…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…
