У Гродне судзяць за абразы міліцыянтаў, чыноўнікаў і прэзідэнта: як правіла, даюць «хімію»

Не менш за 12 крымінальных спраў за абразу супрацоўніка АУС і прадстаўнікоў улады разгледзелі ў Гродзенскай вобласці за першую палову года. Увесну 2021 года было вядома пра 65 асуджаных па Беларусі. Праваабаронцы адзначаюць, што разглядаў больш. Некаторыя абвінавачаныя, па розных прычынах, не пажадалі публічнасці і агалоскі.

Сцэнар у спраў падобны: жыхары вобласці пісалі нейкую фразу ў Telegram-каналах і чатах. Экспертыза прызнавала яе абразлівай. Чалавека затрымлівалі на трое сутак і паведамлялі аб узбуджэнні крымінальнай справы. Некаторыя запісвалі ў міліцыі відэа з «раскаяннем», у якіх выбачаліся за абразу. Як правіла, абвінавачаным прысуджалі адзін-два гады «хатняй» або рэальнай «хіміі». Адзін з абвінавачаных — Андрэй Банушкевіч — не з’явіўся ў суд, яго абвясцілі ў вышук.

Сярод асуджаных — мама ў дэкрэце ў Слоніме, Вадзім Цішкевіч з праблемамі сэрца, лекар ультрагукавой дыягностыкі Алена Фадзеева. Таццяну Кашко затрымалі па справе аб абразе 30 снежня — Новы год яна сустрэла ў ізалятары.

Пад абразай разумеецца наўмыснае прыніжэнне гонару і годнасці асобы, выказанае ў непрыстойнай форме. Як правіла, гэта ўсталёўваюць эксперты аддзела лінгвістычных экспертыз упраўлення Дзяржаўнага камітэта судовых экспертыз (УГКСЭ) па Гродзенскай вобласці.

Хто «абражаўся» ў Гродне і вобласці

• члены выбарчай камісіі,
• Юрый Караеў,
• супрацоўніца АМАП Дар’я Бандарчук,
• супрацоўнікі АМАП і міліцыянты.
• пракурор.

У папярэдняй рэдакцыі Крымінальнага кодэкса існавала арт.189 «Абраза фізічнай асобы з-за непрыязнага стаўлення». У новай рэдакцыі Крымінальнага кодэкса гэты артыкул дэкрыміналізаваны.

Абраза прэзідэнта

Некалькіх гродзенцаў асудзілі за абразу прэзідэнта (арт. 368 КК, да трох гадоў пазбаўлення волі). Напрыклад, Юрыя Панасюка асудзілі на два гады «хатняй хіміі» за 10 рэпостаў фота з выявай Аляксандра Лукашэнкі і надпісамі, якія змяшчаюць, па версіі Следчага камітэта, абразу.

Некаторыя справы за абразу прэзідэнта разглядалі ў закрытых судовых пасяджэннях.

Затрыманні працягваюцца

Жыхара Гродна затрымалі 6 ліпеня. У студзені 2021 года ў Telegram-канале, прызнаным экстрэмісцкім ён, па версіі міліцыі, размясціў абразлівы каментар у дачыненні да ўчастковага Ленінскага раёна Гродна. Мяркуючы па ўсім, гаворка ідзе аб адным слове — «падла». Мужчыну змясцілі ў ізалятар. Распачалі крымінальную справу па факце абразы прадстаўніка ўлады. Падазраваны сваю віну прызнаў і раскаяўся ў зробленым, паведамляе міліцыя Гродна.

Не менш за 10 спраў у Гродне яшчэ трэба разгледзець. Сярод абвінавачаных — лекар Аляксандр Цялега.

Аб колькасці спраў пракуратура распавядала ў сакавіку 2021 года. «Паводле стану на 26 сакавіка 2021 года пракуроры накіравалі ў суды 102 крымінальныя справы аб публічнай абразе прадстаўнікоў улады ў сувязі з выкананнем імі службовых абавязкаў у дачыненні да 103 абвінавачаных, з якіх 65 ужо асуджаныя», — адзначылі ў пракуратуры.