Два будынкі ў гістарычным цэнтры горада і адно на Аўгустоўскім канале прададуць з аўкцыёну 20 і 22 ліпеня. Арганізуе аўкцыён ЗАТ «Цэнтр прамысловай ацэнкі», прадае аб’екты — «Трэст «Гроднагарбуд». Мяркуючы па сайце ipmtorgi.by, ні на адзін аб’ект пакупнікі не заявіліся.

Былая «кафлярня»

Гэта шматфункцыянальны будынак па вул. Чырвонаармейскай, 87. Яго плошча — 1317,3 кв. м, плошча ўчастка — 0,4 га. Пачатковы кошт — 1,23 млн рублёў плюс 488 рублёў выдаткаў. Узнагароджанне арганізатару таргоў - 1% ад цаны продажу лота.

Будынак мае статус помніка гісторыка-культурнай спадчыны з 2016 года. Таму ў пакупніка будуць адпаведныя абмежаванні. Новы ўласнік на працягу 30 дзён падпіша ахоўнае абавязацельства. Будынак прадаюць не першы год. Калісьці там планавалі арганізаваць рамесны рынак. Аб’ектам таксама цікавіўся саліст гурта «Ласковый май» Андрэй Разін.

Кафляная фабрыка была заснаваная князямі Друцкімі-Любецкімі ў 1895 годзе. У самым пачатку XX стагоддзя на прадпрыемстве працавалі 28 чалавек. У 20−30-я гады кафляны завод «Станіславова» вырабляў кафлю высокай якасці, дэкараваную па апошняй модзе, і самыя складаныя дэталі для печаў. У пачатку 1940 года завод уключылі ў склад «Цагляна-кафляна-пліткавага камбіната № 1», кіраўніцтва якога размяшчалася па вул. Чырвонаармейскай, 71.

У склад лота ўваходзіць таксама электратэльфер (грузавы механізм — Hrodna.life).

Аўкцыён у Гродне: прададуць два гістарычныя будынкі ў цэнтры і аб'ект на Аўгустоўскім канале
Чырвонаармейская, 87. Фота: ipmtorgi.by

Чытайце таксама:

Адселены дом на Урыцкага

Нежылы будынак на вул. Урыцкага, 19 таксама прадаецца. Аб’ект уключае таксама склеп і дзве прыбудовы. Яго плошча — 601,3 кв. м. Памер ўчастка — 0,03 га. Пачатковы кошт — 787 908 рублёў. Акрамя кошту за лот, пераможца аплачвае выдаткі прадаўца — 1 282 рублі, а таксама выдаткі арганізатара таргоў - 431 рубель. Узнагароджанне арганізатару таргоў складзе 1,5% ад цаны продажу лота.

Адно са старых назваў вуліцы — Залатарская або Залатая. Назва была звязана з тым, што тут знаходзіліся майстэрні ювелірнага цэха. Забудова вуліцы ў стылі эклектыкі з’явілася на рубяжы XIX і ХХ стст і захавалася. На Урыцкага здымалі некалькі беларускіх фільмаў аб Другой сусветнай вайне.

Новы ўласнік таксама падпіша ахоўнае абавязацельства — гэта аб’ект з гістарычнай каштоўнасцю.

Аўкцыён у Гродне: прададуць два гістарычныя будынкі ў цэнтры і аб'ект на Аўгустоўскім канале
Урыцкага, 19. Фота: ipmtorgi.by

Гасцініца на Аўгустоўскім канале, што так і не адкрылася

Будынак інтэрнату ў вёсцы Рынкаўцы на беразе Аўгустоўскага канала рэканструююць пад турысцка-рэкрэацыйны цэнтр «Лукамор'е». Плошча будынка — 497,1 кв. м, участка — 0,31 га. Ён усё яшчэ знаходзіцца ў працэсе рэканструкцыі, хоць яго абяцалі адкрыць яшчэ ў 2015 годзе, потым у 2018-м. У выніку да 2019 года там з’явіўся пракат ровараў і лодак, альтанка і мангалы ў арэнду, але гасцініцу так і не скончылі.

Будынак пабудаваны ў 50-х гадах ХХ стагоддзя для працаўнікоў цагельнага завода. Пазней завод закрылі, а падчас рэканструкцыі канала і зусім знеслі. Гісторыкі, праўда, прапаноўвалі захаваць будынак і дэманстраваць там турыстам вытворчасць цэглы старадаўнім спосабам. Інтэрнат завода зачынілі, але зносіць не сталі. У 2015 годзе будынак прастаяў, паведамляе «Перспектива».

Пачатковы кошт — 400 000 рублёў. Пераможца аўкцыёну таксама аплаціць выдаткі ў 487.64 рублёў і ўзнагароджанне арганізатару таргоў - 2% ад цаны продажу лота.

Аб’ект знаходзіцца ў двух кіламетрах ад базы адпачынку «Дамброўка». Там ёсць дзеючы рачны транспарт, аб’екты гандлю. Участак знаходзіцца ў водаахоўнай зоне Аўгустоўскага канала. Гэта значыць, тут існуе абмежаванне на будаўніцтва новых аб’ектаў.

Таксама на аўкцыёне прададуць аб’екты на вул. Гаспадарчай, 4А і на Лідскай, 15А.

Пішу пра людзей з інваліднасцю, актывістаў, палітыкаў і дабрачыннасць.