Польскія консульствы змогуць выдаваць беларусам больш візаў: рашэнні будуць прымаць у Варшаве

Дакументы грамадзян Беларусі для атрымання польскай візы будуць разглядаць у Міністэрстве замежных спраў у Варшаве. Гэта паскорыць працэдуру іх выдачы і дапаможа разгрузіць консулаў.

Такую магчымасць для Беларусі рэгламентуе адмысловае распараджэнне міністра замежных спраў Польшчы ад 28 траўня 2021 года. Дакумент увойдзе ў сілу з 14 чэрвеня.

Рашэнні аб выдачы польскіх візаў, акрамя консулаў, цяпер будзе прымаць Міністр замежных спраў Польшчы.

У лютым 2021 года ў Польшчы ўнеслі змены ў Закон аб замежніках. Пры Міністэрстве замежных спраў вырашылі стварыць спецыяльны аддзел для разгляду заяў на візу. Спіс краін, з якіх можна будзе прымаць дакументы, будзе ўдакладняцца распараджэннем міністра. Першай такой краінай стала Беларусь.

Асноўная мэта такога спрашчэння — паскорыць у першую чаргу выдачу працоўных візаў і скараціць час чакання польскага працадаўцы, паведамляў упаўнаважаны па справах малога і сярэдняга бізнесу. Заявы на выдачу візаў можна будзе падаваць праз консульства або непасрэдна ў згаданы аддзел у Польшчы, удакладняў сайт euroby.info.

Консулаў не стае

У сакавіку Беларусь выслала консула Генеральнага консульства Польшчы ў Брэсце Ежы Цімафеюка праз яго ўдзел у неафіцыйным мерапрыемстве 28 лютага, прысвечаным «дню праклятых жаўнераў» — удзельнікаў антыкамуністычнага падполля. Пракуратура Брэста ўзбудзіла крымінальную справу па факце гераізацыі ваенных злачынцаў. Пасля выслалі двух консулаў Генеральнага консульства ў Гродне, у тым ліку яго кіраўніка Яраслава Ксёнжыка. У адказ на высылку консулаў з Беларусі Польшча выслала некалькі беларускіх дыпламатаў. Цяпер у Гродне застаўся толькі адзін консул.

Чытайце таксама:

• Трех из пяти задержанных по «польскому делу» вывезли в Польшу. Они не смогут вернуться
• В Польше вступил в силу закон об упрощенном приеме на работу медиков-иностранцев
• Больше едут в Польшу, меньше — в Латвию. Сколько граждан покинули Беларусь из-за протестов 2020 года