Гродзенку з анкалогіяй судзяць за счэпку. Яе дачка — у СІЗА па той жа справе

19 сакавіка Але Гарацкевіч паставілі дыягназ — анкалогія. Праз 10 дзён яна даведалася, што на яе завялі крымінальную справу. У той жа дзень, 29 сакавіка, яе дачку Галіну змясцілі ў СІЗА. Суд павінен быў пачацца ў траўні, але пасяджэнне перанеслі ўжо двойчы. Прычына — стан здароўя Алы, якая цяпер на лячэнні ў бальніцы.

«Неяк гэта ўсё за адзін раз звалілася на маю галаву», — распавяла Ала Hrodna.life. Яе абвінавацілі паводле арт. 342 КК «Арганізацыя і падрыхтоўка дзеянняў, якія груба парушаюць грамадскі парадак» і арт. 364 КК «Гвалт альбо пагроза ўжывання гвалту ў дачыненні да супрацоўніка органаў унутраных спраў». Гаворка ідзе пра падзеі 6 верасня 2020 года ў Гродне.

Разам з Алай абвінавачанымі па справе праходзяць яе дачка Галіна Гарацкевіч і Ганна Мароз (абедзве пад вартай). У апошняй — двое непаўналетніх дзяцей, якіх яна выхоўвае адна. Зараз дзеці знаходзяцца ў яе сястры, паведамляе «Гарадзенская вясна».

Справу разглядалі ў судзе Кастрычніцкага раёна Гродна 6 і 18 траўня. Суддзя Дзмітрый Кедаль абвясціў чарговы перанос у справе, бо Ала знаходзілася ў гематалагічным аддзяленні Гродзенскай універсітэцкай клінікі. Дату наступнага пасяджэння вызначаць, калі Алу выпішуць. На пасяджэнне 18 траўня прыйшлі каля 30 чалавек. Сярод іх былі людзі ў цывільным, падобныя да сілавікоў. Дзяўчыны пад вартай трымаюцца спакойна. Іх фота Hrodna.life не дазволілі зрабіць.

Трапіла ў бальніцу напярэдадні суда

Ала — пенсіянерка, ёй 58 гадоў. Да дыягназу яна працягвала працаваць швачкай з-за невялікай пенсіі - 300 рублёў. Цяпер яна збіраецца пакінуць працу. «Зразумела, што мне ўжо не трэба працаваць — прынамсі, на такой працы, пакуль стан не прыйдзе ў нейкую норму».

Пры хваробы Алы на ранніх стадыях трэба знаходзіцца пад медыцынскім наглядам і кожныя 10 дзён здаваць аналізы. Пасля выпіскі 25 сакавіка аналізы Алы палепшыліся, але перад пасяджэннем у судзе 6 траўня яе стан пагоршыўся і 5 траўня лекар парэкамендавала ёй легчы ў бальніцу. Ала праходзіць хіміятэрапію — пакуль лячэнне ідзе добра.

«Як маці, перажываю за дачку»

У дачыненні да дачкі Алы Галіны крымінальную справу распачалі яшчэ ў лістападзе. Да 29 сакавіка яна знаходзілася пад падпіскай аб нявыездзе. У той дзень яе выклікалі ў Следчы камітэт, адкуль яна не вярнулася. 29 сакавіка прыйшлі і дадому да Алы. Паводле яе слоў, Алу не заключылі пад варту толькі з-за хваробы. Паглядзеўшы эпікрыз, падрабязнасці яе стану ўдакладнілі ў бальніцы і ў лекара.

Дачка істотна дапамагала сям'і Алы, распавяла яна Hrodna.life, хоць і жыла асобна. Таму заключэнне пад варту далося сям'і цяжка. У мужа Алы — трэцяя група інваліднасці. Двойчы ён спрабаваў прыйсці ў суд, каб убачыць дачку, але не мог гэта зрабіць з-за цяжкага стану. З сям’ёй Алы жывуць бацькі мужа, якім каля 80 гадоў, бацька мужа — «сардэчнік». Сям'і дапамагаюць сябры Галіны — ходзяць у краму, у выпадку неабходнасці прыносяць перадачы Але.

Ала і Галіна пішуць адзін аднаму лісты. Яны ідуць 9−10 дзён. «Інфармацыя ўжо неактуальная на той дзень, што я атрымліваю лісты. Бываюць лісты дэпрэсіўныя — я яе магу зразумець. Яна не хоча ўсяго пісаць, таму што і мой стан ведае», — дзеліцца Ала.

Са слоў Алы, Галіну ўсхвалявала, што суд 6 траўня не адбыўся праз шпіталізацыю мамы. «Цяпер яна думае, што я яе падманваю. На самай справе, усё не вельмі дрэнна — я не паміраю, я не прыкавана да ложка. Проста такая хвароба — яна ёсць, і не вылечваецца. Патрэбны пастаянны кантроль і пастаянны прыём прэпаратаў», — распавяла Ала Hrodna.life.

Як будзе лячыцца пасля вынясення прысуду, Ала пакуль не думае. «Як маці, пра сябе я менш за ўсё думаю. Я перажываю за дачку», — кажа гродзенка. Галіна распавяла Але ў лістах, што яе прызналі схільнай да экстрэмізму. Цяпер у суд яе прывозяць, закоўваючы ў кайданкі.

Прысуд за тыя ж падзеі

У Гродне ўжо вынеслі прысуд за падзеі 6 верасня. Уладзіміру Седзянеўскаму, Юрыю Седзянеўскаму, Жанне Захаркевіч прысудзілі тры гады абмежавання волі. Надзею Сцяпанцову прысудзілі да трох з паловай гадоў абмежавання волі. Адбываць пакаранне яны будуць у папраўчых установах адкрытага тыпу. 25 траўня ў Гродзенскім абласным судзе пройдзе разгляд іх апеляцыі.

Таксама ў Беларусі вынеслі прысуды некаторым людзям з сур’ёзнымі захворваннямі. Жыхара Гомеля Аляксея Раманава асудзілі 16 снежня 2020 года ў закрытым судзе нібыта за «абразу прэзідэнта». Нягледзячы на інваліднасць па анкалогіі, яму далі год пазбаўлення волі і накіравалі ў калонію ў Глыбокім, піша «С**бода». У Гомелі 16-гадовага Мікіту Залатарова з эпілепсіяй прысудзілі да пяці гадоў выхаваўчай калоніі за ўдзел у масавых беспарадках.