Журналістку і сябра грамадскага аб’яднання «Рух «За Свабоду» Вольгу Быкоўскую затрымалі ў Лідзе 1 сакавіка каля 16.20. Яна паехала ў Лідскі раённы суд выступаць у якасці сведкі ў працэсе над журналістам Юрыем Дзяшуком. Пра гэта напісаў на сваёй старонцы ў Facebook намеснік старшыні Беларускай асацыяцыі журналістаў Барыс Гарэцкі.
Абноўлена 1 сакавіка, 19.45
Увечары Вольгу Быкоўскую адпусцілі. Пасля вывучэння журналісцкага пасведчання агенцтва БелаПАН маёр Рабушка, які і затрымліваў Вольгу, прынёс прабачэнні і адпусціў яе. Аднак быў затрыманы Яўген Лукашэвіч, які прыйшоў у суд, паведаміла Вольга ў сваім Facebook.
Журналіста з Бярозаўкі Юрыя Дзяшука выклікалі ў Лідскі раённы суд на 16.00 1 сакавіка. Яго абвінавацілі па ч. 3 арт. 23. 34 КаАП (Парушэнне парадку арганізацыі або правядзення масавых мерапрыемстваў, здзейсненае паўторна).
Адміністрацыйную справу завялі пасля вынясення прысуду актывісту з Бярозаўкі Вітольду Ашурку ў Лідскім раённым судзе 18 студзеня. Тады падтрымаць Ашурка сабраліся каля 50 чалавек. Прысуд — пяць гадоў калоніі - сустрэлі крыкамі «Ганьба!» і «Жыве Беларусь!».
Чытайце таксама: Журналиста Юрия Дешука отпустили из изолятора. Он остается подозреваемым
Юрый Дзяшук: «Сітуацыя абсурдная»
— Сітуацыя абсалютна абсурдная. Супрацоўнікі міліцыі палічылі, што агалошванне прысуду па крымінальнай справе Вітольду Ашурку — гэта быў пікет, несанкцыяванае масавае мерапрыемства. Бо там людзі пасля агалошвання прысуду 5 гадоў Вітольду паддаліся на эмоцыі, частка людзей пачала выкрыкваць: «Жыве Беларусь!» «Ганьба!» «Верым! Можам! Пераможам!» Але самае цікавае, што ў гэтым я не ўдзельнічаў, я проста знаходзіўся ў залі суда, — сказаў журналіст «Радыё Рацыя».
Абноўлена. Журналіста Юрыя Дзяшука асудзілі на штраф у 50 базавых велічынь (1450 рублёў). Пастанову аформіў суддзя Лідскага раённага суда Ігар Кашко, паведамляе harodniaspring.org.
Хто яшчэ праходзіць па справе?
Разам з журналістам па гэтай справе праходзяць яшчэ каля 10 чалавек, якія прысутнічалі на судзе над Вітольдам Ашуркам, у тым ліку гродзенскі актывіст Ежы Грыгенча. Усім ім пагражае штраф альбо адміністрацыйны арышт.
