У снежні на першым паверсе ГЦ «Kazzarma Mall» на выставе «ИЗОляция» можна ўбачыць 80 карцін мастака Пятра Янушкевіча. Выкарыстоўваць плошчы як арт-прастору вырашылі часова — пакуль туды не заедзе арандатар. Зрэшты, высветліла карэспандэнт Hrodna.life, галерэя можа працягнуць працу, калі будуць добрыя прапановы ад мастакоў.
Другую чаргу гандлёвага цэнтра «Kazzarma Mall» на вул. Шчорса, 11б здалі ў лістападзе. Да ўезду арандатараў тры свабодных залы вырашылі выкарыстоўваць для выстаў, каб падтрымаць беларускіх мастакоў. Валодае плошчамі група кампаній «Спектр».
Ваенную казарму пабудавалі ў 1935 годзе як частку ваеннага гарадка. Дзве казармы на месцы былога ваеннага гарадка на вуліцах Шчорса і Пралетарская доўгі час пуставалі. У верасні 2017 года іх купілі за адну базавую дзве прыватныя кампаніі. Пры рэканструкцыі будынкаў уласнікі пастараліся захаваць старадаўнія элементы і зрабілі акцэнт на гісторыю ваеннага гарадка. Так з’явілася і назва — Kazzarma Mall.
Працы Пятра Янушкевіча выставілі першымі. Мастак — сябар заснавальніка кампаніі «Спектр-Лайн» Аляксандра Каськевіча. У тым ліку на выставе можна ўбачыць палотны з асабістай калекцыі ўладальніка кампаніі.
Фактычна выстава стала дабрачыннай: мастак падаў карціны бясплатна, галерэя нічога не заробіць на арэндзе. «Проста захацелі несці мастацтва ў масы і пазнаёміць людзей з таленавітым гродзенскім мастаком. Дзякуй яму, што пагадзіўся выставіць яго працы», — сказаў Hrodna.life піяр-менеджэр «Спектр-Лайн» Павел Лапато. Выставу можна наведаць бясплатна штодня з 11.00 да 20.00 да 20 снежня.
Што можна ўбачыць на выставе?
У галерэі прадстаўлены каля 80 карцін з розных перыядаў жыцця Янушкевіча.
— Назва [выставы «ИЗОляция"] я абраў таксама нездарма. Мастак заўсёды знаходзіцца ў ізаляцыі ад грамадства, у майстэрні, у месцы, дзе ён можа тварыць. < … > Тут я хачу паказаць свой унутраны свет, выйсці са сваёй ізаляцыі. Праз карціны я пачынаю кантактаваць з соцыумам, бо па-іншаму не атрымаецца», — сказаў на адкрыцці Пётр Янушкевіч.
На адкрыцці вернісажу сабраліся каля 30 чалавек, — так можна было выконваць сацыяльнае дыстанцыяванне. Выставу штодня наведвае 80−100 чалавек. Супрацоўнікі імкнуцца не пускаць больш за пяць чалавек і просяць усіх апранаць маскі.
Наведвальнікі цікавяцца купляй карцін — так прадалі ўжо пяць карцін. Кошт некаторых з іх — $ 400.
Ці з’явіцца пастаянная галерэя на Шчорса?
Пасля адкрыцця галерэі да кіраўніцтва пляцоўкі звярнуліся некалькі чалавек, якія хацелі выставіць свае працы ўжо на платнай аснове. Пасля навагодніх святаў прапановы разгледзяць.
Спачатку галерэі ў гандлёвым цэнтры не павінна было быць, але калі прапановы аўтараў карцін будуць працягваць паступаць, а попыту з боку арандатараў не будзе, у Kazzarma Mall будуць «старацца на ўсю моц прасоўваць мастацтва». Па словах уладальнікаў пляцоўкі, залежыць ад таго, як часта будуць паступаць прапановы.
У Гродне мала выставачных прастор: працуе Гродзенская выставачная зала, галерэя «Тызенгауз», культурны цэнтр «Фестывальны». Але за апошнія некалькі гадоў зачыніліся арт-галерэя «Крыга"і» У Майстра". Выставы часам праходзяць у іншых прасторах. Мастакі настойваюць: гораду патрэбен мастацкі музей.
«Позор, что его нет». Зачем Гродно художественный музей и когда он может появиться
Сергей Гриневич открыл выставку о внутренней эмиграции с «неликвидными» картинами
Што будзе ў другім памяшканні Kazzarma Mall?
Паступова плошчы гандлёвага цэнтра запаўняюць арандатары — крамы і салоны паслуг, пуставаць яны не будуць, упэўненыя ў «Kazzarma Mall». У бліжэйшы час там адкрыецца трэнажорная зала, магазін «Гродзенскага мясакамбіната» і дзіцячы пакой. «Калі будавалі, ужо ведалі, каго запрасіць і хто заедзе», — распавялі Hrodna.life у гандлёвым цэнтры.
Крызіс з-за каранавіруса і палітычнай сітуацыі ў краіне не паўплываў на працу першай часткі Kazzarma Mall, якая адкрылася ў сакавіку 2020 года. За паўгода адтуль з’ехаў толькі адзін арандатар па прычынах, не звязаных з крызісам, кажуць у кампаніі.
Першую частку ГЦ «Kazzarma Mall» па адрасе вул. Шчорса, 11а адкрылі ў Гродне ў сакавіку 2020 года. Пры рэканструкцыі будынкаў уласнікі пастараліся захаваць старадаўнія элементы і зрабілі акцэнт на гісторыю ваеннага гарадка. Галоўнай мэтай было забяспечыць камфортныя ўмовы пражывання жыхарам новага раёна, які знаходзіцца практычна ў цэнтры Гродна.
