Гродзенцы паспрабуюць размаўляць з уладамі. Каб зразумець, як гэта зрабіць, зладзяць хакатон

У Гродне паспрабуюць аднавіць камунікацыю паміж грамадзянскай супольнасцю і гарадскімі ўладамі. Каб знайсці эфектыўны і адначасова бяспечны фармат, зладзяць крэатыўную сустрэчу, дзе абмяркуюць нават самыя незвычайныя прапановы.

Ідэя аднавіць дыялог належыць грамадскім актывістам, якія ў жніўні 2020 года дамагліся ад адміністрацыі горада выканання сваіх патрабаванняў. Тыя дамовы неўзабаве былі сарваныя, а ціск на грамадскую супольнасць Гродна істотна ўзмацніўся. Таму актуальным застаецца пытанне: у якіх формах можна працягваць камунікацыю, каб урэшце тыя, хто выказвае іншы за афіцыйны пункт погляду, былі пачутыя.

Пра ініцыатыву размаўлялі на сустрэчы «Свабодны вечар». Яе арганізаваў праект InspiredByРэгіён 19 лістапада ў Цэнтры гарадскога жыцця.

Аднавіць давер паміж бакамі

«Трэба, каб гэта [новыя формы камунікацыі - Hrodna.life] было прынята большасцю жыхароў гораду і ў той жа час выканальна для сённяшняй сітуацыі», — лічыць намеснік старшыні партыі БНФ Вадзім Саранчукоў, адзін з ініцыятараў дыялогу. Ён упэўнены, што альтэрнатывы перамовам не існуе. «На пэўным этапе ўсё роўна і з аднаго і з другога боку зрасцецца ў галаве ідэя, што мы павінны дамовіцца. І да гэтага моманту трэба быць гатовымі», — кажа Вадзім.

Вадзім Саранчукоў падкрэслівае, што перамовы стануць магчымыя толькі пасля выбудовы сістэмы ўзаемнага даверу, калі прынцыповыя патрабаванні аб спыненні гвалту і вызваленні палітвязняў не ігнаруюцца, а абодва бакі размаўляюць на роўных. Аднак техналогію аднаўлення даверу трэба яшчэ ствараць.

Будзе свая дыялогавая пляцоўка

Абмеркаваць фармат адносінаў з мясцовай уладай і далейшы план дзеянняў гродзенцаў запросяць праз два тыдні. Пра гэта распавёў Hrodna.life адзін з арганізатараў мерапрыемства, прадстаўнік InspiredByРэгіён Іван Петушок.

«Гэта будзе фармат хакатону, калі удзельнікі змогуць аб’яднацца ў праекты і правесці мазгавы штурм. Мы запрашаем усіх зацікаўленых, тут няма падзелу на сваіх і чужых. Калі ёсць прадстаўнікі ўлады, якія сапраўды гатовыя ўключыцца ў такую дыскусію, мы будзем толькі рады», — кажа Іван Петушок.

Ён мяркуе, што такія сустрэчы дазволяць стварыць якасную дыялогавую пляцоўку. Яна дапаможа знайсці эфектыўны і бяспечны спосаб камунікацыі паміж актыўнымі гродзенцамі і ўладай.

На хакатоне абмяркуюць таксама шляхі дапамогі Гродзенскаму дзіцячаму хоспісу, канцэпцыю свабоднага творчага руху Гродна, праблемы незалежных СМІ.

Актывісты змогуць аб’яднацца

Агульная пляцоўка дасць магчымасць аднадумцам аб’яднацца і каардынаваць свае дзеянні. Так, у час «Свабоднага вечару» актывіст Дзмітрый Салаш расказаў, што ў горадзе ўжо ствараецца «Гродзенскі клуб выбаршчыкаў». Ён таксама мае на мэце дагрукацца да ўладаў. Удзельнікі клуба паспрабуюць данесці да дэпутатаў патрабаванні аб сумленных выбарах, спыненні рэпрэсій, вырашэнні іншых праблемаў гараджан.

На сустрэчы гарадскіх ініцыятыў апроч неабыякавых гродзенцаў прапануюць запрашаць і экспертаў з іншых гарадоў. Напрыклад, Дзмітрый Салаш прапанаваў арганізаваць сустрэчу з прадстаўніком Святланы Ціханоўскай па канстытуцыйнай рэформе Анатолем Лябедзькам.

Чытайце таксама: Гродно — город свободных людей. Как протестовали гродненцы в разные годы