Гродненский областной драматический театр в Гродно
Галоўны рэжысёр Гродзенскага абласнога драматычнага тэатра Генадзь Мушперт і рэжысёр-пастаноўшчык, заслужаны артыст Сяргея Курыленкі падпісалі загады на звальненне. Іх звольнілі па артыкуле Працоўнага кодэкса за адмову ад выканання службовых абавязкаў, паведамілі яны Hrodna.life. Раней яны абвясцілі страйк. Дырэктар тэатра Ігар Гедзіч будзе «вырашаць пытанне» з адсутнасцю рэжысёраў, перадалі яго словы рэжысёры. Hrodna.life атрымаць каментар у дырэктара не ўдалося.
Супрацоўнікі драмтэатра падпісалі загады на звальненні, працоўныя кнігі яны яшчэ не атрымалі. 27 кастрычніка яны збіралі рэчы. Калегі з драмтэатра і тэатра лялек, некаторыя гледачы прыйшлі падтрымаць рэжысёраў.
Сяргей Курыленка прапрацаваў у Гродзенскім драмтэатры 40 гадоў, Генадзь Мушперт — 26. А ў цэлым апошні працаваў 48 гадоў у дзевяці тэатрах СССР. За апошнія два тыдні Мушперт упершыню за час працы атрымаў дзве вымовы. Прычына абодвух — рэжысёр своечасова не прадставіў план пастановак на 2021 год. «Я не мог гэтага зрабіць, таму што звольнены артыст Уланаў» (Ігара Уланава звольнілі 25 верасня 2020 года. Раней ён адмовіўся падпісаць тлумачальную запіску з нагоды спыненага 20 верасня спектакля). У Курыленка таксама ёсць вымова — за што, ён не ведаў.
— Чаму мы далучыліся да страйку? Таму што хочам быць разам з народам. Я пачаў сваю працу ў Гродзенскім тэатры разам з тым, як спадар Лукашэнка атрымаў уладу. І вось я вельмі спадзяюся, што я сышоў з пасады — і ён таксама сыдзе. Думалі не адзін дзень. Тое, што адбылося ў нядзелю ў Мінску, зрабіла маю працу ў тэатры немагчымай. Пры такім становішчы працаваць немагчыма, тым больш, рэпеціраваць лёгкую камедыю. Я адчуваю сваю адказнасць перад тэатрам — і таму далучаюся да страйку. Калі патрабаванні народнай забастоўкі будуць выкананыя, мы вернемся ў тэатр, — растлумачыў Генадзь Мушперт Hrodna.life.
— Ніякіх планаў няма. Доўга думаў. Гэта не такое простае рашэнне. Але я вырашыў, што трэба так, — пракаментаваў Сяргей Курыленка Hrodna.life. — Нічога не магу планаваць. Не ведаю, чым я буду займацца, акрамя тэатра.
— Тэатр — гэта наша галоўная справа жыцця, у адрозненні ад дырэктара, для якога гэта толькі прыступка кар’ерная. Я нічым не займаўся ў сваім жыцці, акрамя тэатра, пачынаючы з 16 гадоў, — дадаў Генадзь Мушперт.
28 кастрычніка групе артыстаў драмтэатра трэба будзе граць чарговую камедыю «Деньги как дождь 18+». Яны плануюць адмовіцца граць спектакль і асцерагаюцца звальненняў па тым жа, што і рэжысёры, артыкуле. Раней частка артыстаў прапаноўвалі дырэктару адмовіцца ад камедыйных пастановак, пакуль у краіне адбываецца гвалт. Той не пагадзіўся.
Чытайце таксама:
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Некалькі сотняў Дзядоў Марозаў, Снягурак, сабачак, вавёрачак і разнастайных іншых персанажаў 20 снежня прайшлі ад…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…