У Зарыцы на прыпынку намалявалі чырвона-зялёны сцяг і надпіс «Я мы Бацька». Раней там былі надпісы «Стоп таракан» і бел-чырвона-белы сцяг, але іх замалявалі камунальнікі.
Чытач Hrodna.life Іван Сарокін, які заўважыў надпіс, лічыць, што гэта «тролінг уладаў». Яму цікава, як хутка камунальнікі зрэагуюць гэтым разам.
«Спачатку там было напісана „Стоп таракан“. Каля месяца ніхто не зафарбоўваў. Пасля намалявалі бел-чырвона-белы сцяг. Ён быў некалькі дзён, а потым прыехалі камунальнікі зафарбавалі і ўсе. Прайшлі суткі і там з’явіўся чырвона-зялёны сцяг і надпіс „Я мы бацька“. Пакуль ніхто не зафарбоўвае. Хто гэта рабіў, невядома. Паглядзім, як доўга пратрымаецца».
Звязацца з камунальнымі службамі, якія зафарбоўвалі надпісы ў Зарыцы, рэдакцыі Hrodna.life не ўдалося.
Што яшчэ малююць у Гродне?
Яшчэ да выбараў у Гродне на сценах будынкаў, платах, прыпынках і асфальце сталі масава з’яўляцца надпісы «Стоп таракан», ЯМЫ-97% і 3%. Пасля выбараў гродзенцы малявалі ў асноўным бел-чырвона-белыя сцягі. Надпісы «Я мы Бацька» і чырвона-зялёны сцяг з’явіліся ў Гродне на прыпынку ўпершыню.
