Міністр адукацыі даручыў узмацніць меры бяспекі ў ВНУ і школах

Ігар Карпенка, Міністр адукацыі Беларусі, даручыў гарантаваць бяспеку вучняў, выкладчыкаў і работнікаў устаноў пры арганізацыі навучальнага працэсу і знаходжання ў адукацыйных установах. Пра гэта паведамляе міністэрства ў сваім Telegram-канале, піша Onliner.by.

У прыватнасці, плануецца наступнае:

• прыняць дадатковыя меры па ўзмацненні кантролю доступу старонніх ва ўстановы адукацыі, а таксама іншыя меры па ўмацаванні ў іх рэжыму бяспекі;
• арганізаваць узаемадзеянне ўсіх зацікаўленых службаў, у тым ліку органаў аховы і правапарадку, у мэтах выканання практычных мерапрыемстваў па забеспячэнні бяспечных умоў знаходжання грамадзян ва ўстановах адукацыі.

Лісты з гэтымі даручэннямі накіраваны ва ўсе ўстановы адукацыі.

Учора Telegram-канал «Молодежный поезд» апублікаваў тэзісы размовы з Ігарам Карпенкам: 1 верасня ў Мінску было затрымана 34 студэнты і «большасць з іх адпусцілі», міністр чытае розныя Telegram-каналы (называць іх не стаў) і паскардзіўся, што ВНУ не прадстаўленыя на гэтай платформе.